چینی صدر کے سرکاری اکائونٹ سے امریکہ کو زوال پذیرسلطنت قرار دیا گیا۔

چینی صدر شی جن پنگ کے سرکاری کامنٹری اکاؤنٹ سے ایک پیغام جاری کیا گیا ہے کہ دنیا امریکہ کے بغیر بھی آگے بڑھ سکتی ہے۔ اگر امریکہ دنیا کا احترام کھو بیٹھا ہے تو وہی سبق سیکھے گا جو ہر زوال پذیر سلطنت نے بہت دیر سے سیکھا کہ ’دنیا کسی کے لئے نہیں رُکتی، ہمیشہ آگے بڑھتی رہتی ہے۔ ‘چینی صدر کے مائیکرو بلاگنگ ویب سائٹ ایکس اکاؤنٹ پر تحریر جاری کی گئی ہے کہ سو سال پہلے برطانوی سلطنت عالمی تجارت پر چھائی ہوئی تھی اور دنیا کی ۲۰؍ فیصد سے زائد دولت اس کے پاس تھی، لوگ سمجھتے تھے اس کا سورج کبھی نہیں ڈھلے گا لیکن ہم نے ۷۰؍ برس قبل یہ بھی دیکھا۔ پیغام میں یہ بھی لکھا گیا ہے کہ دو سو سال پہلے، فرانس یورپ کے اُفق پر چھایا ہوا تھا اس کی افواج سے لوگ ڈرتے تھے، اس کی ثقافت قابلِ رشک تھی، نپولین نے خود کو لازوال قرار دیا تھا لیکن اس کا کیا ہوا یہ ہمیں بتانے کی ضرورت نہیں ہے۔ 
 چار سو سال پہلے، ہسپانوی تخت و تاج منیلا سے میکسیکو تک حکومت کر رہا تھا۔ اس کے خزانے چاندی اور ریشم سے بھرے ہوتے تھے، ہسپانوی بادشاہ سمجھتے تھے کہ ان کی عظمت ہمیشہ باقی رہے گی ہر سلطنت نے خود کو ناگزیر سمجھا لیکن ہر ایک کا سورج غروب ہوا۔ ایکس پیغام میں لکھا گیا ہے کہ طاقت کمزور پڑ جاتی ہے، اثر و رسوخ بدل جاتا ہے اور قانونی حیثیت اسی لمحے دم توڑ دیتی جب اسے حاصل کرنے کے بجائے خود پر فرض کر لیا جائے۔ اگر امریکہ دنیا کا احترام کھو بیٹھا، تو وہی سبق سیکھے گا جو ہر زوال پذیر سلطنت نے بہت دیر سے سیکھا ہے کہ دنیا کسی کے لئے نہیں رکتی، ہمیشہ آگے بڑھتی رہتی ہے۔