تھانے کے گھوڑبندر روڈ پر گائےمکھ روڈ کی حالت مسلسل خراب ہونے کے  پیش نظر مرمت کی مہم شروع کی گئی ہے۔ مرمت کا کام جمعہ۱۲؍ سے ۱۴؍ دسمبر کے درمیان کیا جائے گا۔ تھانے ٹریفک پولیس کے مطابق، ٹریفک میں خلل کی وجہ سے ہفتے کے آخر میں ٹریفک جام  کا اندیشہ ہے۔

نوبھارت ٹائمس کی  رپورٹ کے مطابق  جمعہ۱۲؍ دسمبر کو آدھی رات ۱۲؍ بجے، کاسر وڈولی ٹریفک سب ڈویژن کی حدود میں، گائےمکھ نیرا کیندر، کاجوپاڑا اور فاؤنٹین ہوٹل کے درمیان سڑک پرمرمت کا کام کیا جائے گا۔ اس دوران بھاری گاڑیوں کا رخ موڑ دیا جائے گا اور یہ سلسلہ اتوار۱۴؍ دسمبر کی رات۱۲؍ بجے تک جاری رہے گا۔

تھانے سے گھوڑبندر روڈ کی طرف بھاری گاڑیوں کا داخلہ ممبئی جنکشن کے قریب وائے جنکشن اور کاپورباوڑی جنکشن پر روک دیا گیا ہے۔ گاڑیاں وائے جنکشن سے براہ راست ناسک روڈ، کھارےگاؤں ٹول ناکہ، مانکولی اور انجور پھٹا کی طرف جائیں گی۔ کا پورباوڑی میں، یہ گاڑیاں دائیں مڑیں گی اور کشیلی اور انجورفاٹا کے راستے اپنی منزل پر پہنچیں گی۔ تھانے ٹریفک پولیس نے اس سلسلے میں نوٹیفکیشن جاری کر دیا ہے۔

ممبرا اور کلوا سے گھوڑبندر روڈ کی طرف آنے والی گاڑیوں کو کھارےگاؤں ٹول ناکہ پر جانے کی اجازت نہیں ہوگی۔ یہ گاڑیاں کھارےگاؤں کریک بریج، کھارےگاؤں ٹول ناکہ، مانکولی اور انجور پھٹا کے راستے اپنی منزل کی طرف روانہ ہوں گی۔

بھاری گاڑیوں کی وجہ سے تھانے شہر میں اکثر ٹریفک جام رہتا ہے۔ گھوڑبندر علاقہ کے مکین اس مسئلہ سے سخت پریشان ہیں اور کئی بار اس کے خلاف احتجاج کر چکے ہیں۔ گزشتہ سال گھوڑبندر علاقے کے رہائشی احتجاج میں سڑکوں پراتر آئے تھےجس کے بعد مہاراشٹر کے نائب وزیر اعلیٰ ایکناتھ شندے نے تھانے، پال گھر اور نوی ممبئی کے پولیس اور انتظامی افسران کے ساتھ میٹنگ کی تھی۔ انہوں نے بھاری گاڑیوں کی ٹریفک کو ریگولیٹ کرنے کی ہدایات جاری کی تھیں۔