بالی ووڈ اداکارہ شردھا کپور کی آنے والی سوانحی فلم’’ایٹھا‘‘ (Eetha) کا ٹریلر جاری کردیا گیا ہے، جس میں اداکارہ ایک مشہور مراٹھی تماشا اور لاونی فنکارہ وٹھابائی بھاؤ منگ نارائن گاؤںکر کے کردار میں نظر آرہی ہیں۔

بالی ووڈ اداکارہ شردھا کپور کی آنے والی سوانحی فلم’’ایٹھا‘‘ (Eetha) کا ٹریلر جاری کردیا گیا ہے، جس میں اداکارہ ایک مشہور مراٹھی تماشا اور لاونی فنکارہ وٹھابائی بھاؤ منگ نارائن گاؤںکر کے کردار میں نظر آرہی ہیں۔ فلم کے ٹریلر نے اپنی جذباتی کہانی، شاندار رقص، روایتی مراٹھی ثقافت اور شردھا کپور کے منفرد انداز کے باعث ناظرین کی توجہ حاصل کی ہے۔ فلم کی ہدایت کاری لکشمن اُتیکر نے کی ہے، جو اس سے قبل’’چھاوا‘‘ جیسی فلم کے ذریعے اپنی شناخت بنا چکے ہیں۔ ’ایتھا‘ میں شردھا کپور ایک ایسی خاتون فنکارہ کا کردار ادا کر رہی ہیں جنہوں نے زندگی میں بے شمار مشکلات، سماجی رکاوٹوں اور نامساعد حالات کا سامنا کرنے کے باوجود اپنے فن کے ذریعے الگ مقام حاصل کیا۔ فلم کی کہانی مہاراشٹر کی معروف تماشا اور لاونی فنکارہ وٹھابائی نارائن گاؤںکر کی زندگی پر مبنی ہے۔ ٹریلر میں  ۱۹۵۰ء اور ۱۹۶۰ء کی دہائیوں کے ماحول، روایتی لوک فن، رنگا رنگ اسٹیج پرفارمنس اور فنکارہ کی ذاتی زندگی کے مختلف پہلوؤں کی جھلک دکھائی گئی ہے۔ کہانی میں یہ بھی دکھایا گیا ہے کہ کس طرح وٹھابائی نے مشکلات کے باوجود اپنے فن سے وابستگی برقرار رکھی اور اپنی محنت، حوصلے اور صلاحیت کے ذریعے عوام میں مقبولیت حاصل کی۔

یہ بھی پڑھئے :زیوریو۲؍ نومبر کو عالمی نمبر ایک بن جائیں گے

ٹریلر کے ابتدائی مناظر میں شردھا کپور کا کردار ذہنی اور جذباتی کشمکش سے گزرتا دکھائی دیتا ہے، لیکن بعد کے مناظر میں وہ اپنے فن اور شناخت کو بچانے کے لیے دوبارہ جدوجہد کرتی نظر آتی ہیں۔ فلم میں لاونی رقص اور تماشا فن کو محض تفریح کے بجائے ایک فنکارہ کی شناخت، خودداری اور ثقافتی ورثے کے طور پر پیش کیا گیا ہے۔
 فلم میں رندیپ ہڈا بھی اہم کردار ادا کر رہے ہیں۔ وہ وٹھابائی کے شوہر انا ساونت مرچنٹ کے کردار میں دکھائی دیں گے۔ شردھا کپور اور رندیپ ہڈا کے علاوہ محمد ذیشان ایوب، سدھارتھ جادھو، اننت جوشی اور دیگر فنکار بھی فلم کا حصہ ہیں۔ فلم کی موسیقی معروف موسیقار جوڑی اجے۔اتل نے ترتیب دی ہے، جبکہ رقص کی کوریوگرافی ویبھوی مرچنٹ نے کی ہے۔ فلم کی کہانی اور اسکرین پلے کی ذمہ داری کشتیج پٹوردھن اور لکشمن اُتیکر نے سنبھالی ہے۔

یہ بھی پڑھئے:’’مرزا پور: دی مووی‘‘ او ٹی ٹی پر ریلیز، شائقین کے لیے توسیع شدہ ورژن بھی پیش

’’ایٹھا‘‘ کو میڈاک فلمز اور کتھ پتلی کریئشنز کے بینر تلے تیار کیا گیا ہے۔ فلم کے پروڈیوسرز میں دنیش وجن، لکشمن اُتیکر اور کرشمہ شرما شامل ہیں۔ یہ فلم ۴؍ دسمبر  ۲۰۲۶ء کو سنیما گھروں میں ریلیز ہونے والی ہے۔ شردھا کپور کے لیے یہ فلم ایک اہم تبدیلی کی حیثیت رکھتی ہے، کیونکہ وہ اس میں اپنے معروف تفریحی کرداروں سے ہٹ کر ایک حقیقی فنکارہ کی زندگی، جدوجہد اور ثقافتی ورثے کو پردۂ سیمیں پر پیش کرتی نظر آئیں گی۔ ٹریلر کی ریلیز کے بعد فلم کے شائقین میں اس کے حوالے سے دلچسپی بڑھ گئی ہے۔