امریکی صدر ڈونالڈ ٹرمپ نے کہا کہ ایران آزادی کی طرف دیکھ رہا ہے۔ مزید انہوں نے کہا کہ واشنگٹن ایران کے لوگوں کی مدد کرنے کیلئے تیار ہے۔

امریکہ کے صدر ڈونالڈ ٹرمپ نے سنیچر کے روز کہا کہ ایرانی ’’آزادی کی طرف دیکھ رہے ہیں‘‘، جبکہ ملک بھر میں مظاہروں کا سلسلہ جاری ہے، انہوں نے مزید کہا کہ واشنگٹن مدد کی پیشکش کے لیے تیار ہے۔ ٹرمپ نے اپنے سوشل میڈیا پلیٹ فارم ٹروتھ سوشل پر لکھا کہ ’’ایران آزادی کی طرف دیکھ رہا ہے، جیسے کہ پہلے کبھی نہیں تھا۔‘‘ مزید لکھا کہ ’’امریکہ مدد کے لیے تیار ہے!!!‘‘

Iran is looking at FREEDOM, perhaps like never before. The USA stands ready to help!!! President DONALD J. TRUMP

— Commentary: Trump Truth Social Posts On X (@TrumpTruthOnX) January 10, 2026

ایران میں دسمبر کے آخر سے مظاہرے دیکھنے میں آ رہے ہیں، جس کی بڑی وجہ ایرانی ریال کی قدر میں زبردست گراوٹ اور بگڑتے ہوئے معاشی حالات ہیں۔ یہ مظاہرے ۲۸؍ دسمبر کو تہران کے گرینڈ بازار کے قریب شروع ہوئے اور بعد میں کئی شہروں تک پھیل گئے۔ جمعہ کو ٹرمپ نے کہا کہ ایران ’’بڑی مصیبت میں‘‘ ہے کیونکہ بدامنی بڑھ رہی ہے، انہوں نے مزید کہا کہ واشنگٹن پیش رفت پر گہری نظر رکھے ہوئے ہے اور حکام کو مظاہرین کے خلاف مہلک طاقت کے استعمال سے خبردار کر رہا ہے۔ واضح ہو کہ ایران نے امریکہ اور اسرائیل پر بدامنی کو ہوا دینے کا الزام لگایا ہے، حکام نے متنبہ کیا ہے کہ سیکورٹی فورسز اور عدلیہ ’’تخریب کاروں کے خلاف کسی قسم کی رواداری نہیں برتیں گے۔‘‘