ٹرمپ نے ماؤنٹ رشمور پر خود کی اے آئی سے تیار کردہ تصویر شیئر کی، جس کےبعد قیاس آرائیاں شروع ہوگئیں کہ آیا وہ خود کی کوئی یاد گار تعمیر کرنا چاہتے ہیں، تاہم اس وقت اس مشہور یادگار پر ٹرمپ کا مجسمہ شامل کرنے کی کوئی سرکاری تجویز موجود نہیں ہے۔

امریکی صدر ڈونالڈ ٹرمپ نے ماؤنٹ رشمور کی ایک اے آئی سے تیار کردہ تصویر شیئر کی ہے جس میں ان کا مجسمہ دیگر امریکی صدور کے ساتھ شامل کیا گیا ہے۔ ٹرمپ نے اپنے سوشل میڈیا پلیٹ فارم `ٹروتھ سوشل پر یہ تصویر بغیر کسی تبصرے کے پوسٹ کی، جس میں وہ جارج واشنگٹن، تھامس جیفرسن، تھیوڈور روزویلٹ اور ابراہم لنکن کے ساتھ نظر آ رہے ہیں۔یہ اے آئی تصاویر مداحوں اور ناقدین دونوں میں وائرل ہو گئی ہیں، تاہم اس وقت اس مشہور یادگار پر ٹرمپ کا مجسمہ شامل کرنے کی کوئی سرکاری تجویز موجود نہیں ہے۔

یہ بھی پڑھئے: اسرائیلی فوج نے مسجد ابراہیمی کو غیر معینہ مدت کیلئے بند کردیا

واضح رہے کہ ماؤنٹ رشمور نیشنل میموریل ایک زبردست مجسمہ ہے جسے کیسٹون، ساؤتھ ڈکوٹا میں بلیک ہلز کے گرینائٹ چہرے پر کندہ کیا گیا ہے۔ اس میں چار امریکی صدور جارج واشنگٹن، تھامس جیفرسن، تھیوڈور روزویلٹ، اور ابراہم لنکن کے ۶۰؍فٹ لمبے چہرے ہیں جو ملک کی بنیاد، توسیع، ترقی اور تحفظ کی علامت کے لیے ڈیزائن کیے گئے ہیں۔ مجسمہ ساز گٹزن بورگلم نے ان چار مخصوص لیڈروں کو امریکہ کی تاریخ کے پہلے۱۵۰؍ سالوں کی نمائندگی کرنے کے لیے منتخب کیا۔ جارج واشنگٹن قوم کی بنیاد اور آزادی کی جدوجہد کی نمائندگی کرتا ہے۔ تھامس جیفرسن توسیع کی نمائندگی کرتا ہے۔ تھیوڈور روزویلٹ ملک کی ترقی اور عالمی طاقت کے طور پر اس کے ابھرنے کی نمائندگی کرتا ہے۔ ابراہم لنکن خانہ جنگی کے دوران تحفظ کی نمائندگی کرتا ہے۔

یہ بھی پڑھئے: امریکہ: ہند نژاد طالب علم نے اسکرپس نیشنل اسپیلنگ بی جیت لیا

یہ بھی یاد رہے کہ۲۰۱۸ء میں ٹرمپ نے جنوبی ڈکوٹا کی گورنر کو بتایا تھا کہ ان کا خواب ہے کہ ان کا چہرہ بھی اس یادگار پر کندہ کیا جائے۔بعد ازاں انہوں نے۲۰۲۰ء میں بھی یہ خیال دہرایا تھا۔ تاہم کانگریس میں ٹرمپ کے حامیوں نے باضابطہ بل پیش کیے ہیں جس میں ڈیپارٹمنٹ آف انٹیریئر کو ٹرمپ کی شکل کندہ کرنے کا حکم دینے کا مطالبہ کیا گیا ہے۔