امریکی وسط مدتی انتخابات میں نوجوان امیدواروں کی کامیابی نے کانگریس میں نئی نسل کی نمائندگی کو نمایاں کردیا ہے، جہاں مختلف سیاسی نظریات رکھنے والے نوجوان لیڈرز قومی سیاست میں اپنی جگہ بنا رہے ہیں۔

امریکہ کے وسط مدتی انتخابات میں ۲۰؍ اور ۳۰؍ سال کی عمر کے دو سیاستداں کانگریس کیلئے منتخب ہونے والے کم عمر ترین امیدواروں میں شامل ہیں۔ ان کی کامیابی سے امریکی قومی سیاست میں نوجوان نسل کی نئی آوازوں کی شمولیت ہوئی ہے۔ ریپبلکن پارٹی کے ۲۶؍ سالہ مائیکل الفانسو نے وسکونسن کے ساتویں کانگریشنل ضلع میں ڈیموکریٹ امیدوار فریڈ کلارک کو شکست دے دی۔ اس کامیابی کے ساتھ وہ ایوانِ نمائندگان کے کم عمر ترین رکن اور ۲۰۰۰ء کے بعد پیدا ہونے والے پہلے ایسے شخص بن گئے ہیں جو امریکی کانگریس میں خدمات انجام دیں گے۔

یہ بھی پڑھئے: جاپان: شرح پیدائش میں ۱۱؍ سال میں پہلی بارااضافہ، آبادی کا بحران برقرارا

مائیکل الفانسو سیاست میں نئے ہیں اور امریکی وزیرِ ٹرانسپورٹ شان ڈفی کے داماد ہیں۔ انہوں نے ’’امریکہ فرسٹ‘‘ کے ایجنڈے پر انتخاب لڑا اور صدر ڈونالڈ ٹرمپ کی بھرپور حمایت کی۔ ان کی انتخابی مہم میں تعلیم، صحت اور پیشہ ورانہ تربیت سمیت قدامت پسند ترجیحات پر توجہ دی گئی۔ الفانسو نے سوشل میڈیا پلیٹ فارم ایکس پر لکھا، ’’ایوان کے کم عمر ترین رکن اور نئے والد کی حیثیت سے مستقبل سے میرا گہرا تعلق ہے۔‘‘

دوسری جانب ڈیموکریٹ پارٹی کی ۲۹؍ سالہ میلات کیروس نے کولوراڈو کے پہلے کانگریشنل ضلع سے کامیابی حاصل کی۔ ایتھوپیا میں پیدا ہونے والی وکیل اور ڈیموکریٹک سوشلسٹ کیروس کانگریس کے لیے منتخب ہونے والی پہلی خاتون جنریشن زی (Gen Z) رکن بن گئی ہیں۔ اس سے قبل انہوں نے پارٹی کے پرائمری انتخابات میں ڈیموکریٹک پارٹی کی دیرینہ رکن ڈیانا ڈی گیٹ کو شکست دی تھی۔ کیروس غزہ میں اسرائیلی نسل کشی کی نمایاں ناقد رہی ہیں۔ انہوں نے اسرائیل پر اسلحے کی پابندی عائد کرنے اور اسے امریکی فوجی امداد بند کرنے کا مطالبہ کیا ہے۔ وہ سب کے لیے سرکاری صحت بیمہ (میڈیکیئر فار آل) اور تمام بچوں کے لیے نگہداشت کی سہولت کی بھی حمایت کرتی ہیں۔

یہ بھی پڑھئے: اسرائیلی میڈیا کا امریکی کانگریس پر ڈیموکریٹس کے قبضے کے نتائج کا انتباہ

الفانسو اور کیروس کے ساتھ فلوریڈا سے ڈیموکریٹ رکن میکسویل فراسٹ بھی اس نئی نسل کی نمائندگی کر رہے ہیں۔ ۲۹؍ سالہ فراسٹ ۲۰۲۲ء میں منتخب ہونے والے کانگریس کے پہلے جنریشن زی رکن تھے۔ فلسطینیوں کے حقِ خودارادیت کے حامی فراسٹ نے ۲۰۲۶ء میں بھی اپنی نشست برقرار رکھی، کیونکہ انتخاب میں ان کے مقابلے میں کوئی امیدوار میدان میں نہیں تھا۔ ادھر ٹیکساس میں ۳۷؍ سالہ جیمز ٹالاریکو امریکی سینیٹ کے کم عمر ترین رکن بن گئے ہیں۔