ضلعی حکومت کے وکیل راجیش مشرا نے بتایا کہ سماعت کے دوران ضلعی کورٹ نے مسجد کمیٹی سےکہا کہ مسجد کے اے ایس آئی سروے کو پہلے ہی سپریم کورٹ اور الہ آباد ہائی کورٹ نے منظوری دے دی ہے اس لئے اس معاملے میں کورٹ کوئی بھی حکم جاری نہیں کر سکتا۔ خیال رہے کہ انجمن انتظامیہ نے کورٹ میں درخواست داخل کی تھی جس میں مطالبہ کیا تھا کہ مسجد کے اے ایس آئی سروے کو روکا جائے کیونکہ یہ سروے بتائے گئےاصولوں کے خلاف کیا جا رہا ہے۔

وارانسی کورٹ نے گیان واپی مسجد کمیٹی کی جانب سے داخل کی گئی درخواست کو منسوخ کر دیا ہے جس میں اس نے مسجد کا اے ایس آئی سروے روکنے کا مطالبہ کیا تھا۔اس حوالےسے ضلعی حکومت کے وکیل راجیش مشرا نے کہا کہ انجمن انتظامیہ نے کورٹ میں جو درخواست داخل کی تھی اس پر ضلعی کورٹ کے جج اے کے وشویس نے کہا کہ گیان واپی مسجد کے اےایس آئی سروے کو الہ آباد ہائی کورٹ اور سپریم کورٹ نےپہلے ہی منظوری دے دی ۔ اسی لئے اس کورٹ سے اس معاملے میں کوئی بھی حکم پاس نہیں کیا جا سکتا ہے۔
خیال رہے کہ ۳؍ اگست کو الہ آباد ہائی کورٹ نےگیان واپی مسجد کے اےایس آئی سروے کو منظوری دی تھی ۔ یہ سروے اس لئے کیا جا رہا ہے کہ یہ معلوم کیا جاسکے کہ یہ مسجد کسی ہندو ٹیمپل پر بنی تھی یا نہیں۔ اے ایس آئی کو سروے مکمل کرنے کیلئے مزید ۴؍ ہفتوں کی مہلت دی گئی ہے۔ 
اس حوالے سے وکیل مشرا نے مزید کہا کہ انجمن انتظامیہ کمیٹی نے ضلعی کورٹ کے سامنے یہ دعویٰ کیا تھا کہ مسجد کا اے ایس آئی سروے بتائے گئے احکامات کے خلاف کیا جا رہا ہے اور اسے روکا جائے۔ مسجد کمیٹی نے یہ اعتراض بھی کیا تھا کہ فریقین کو کوئی بھی نوٹس نہیں دیا گیا تھا اور نہ ہی کوئی فیس لی گئی تھی جس پر ضلعی جج نے کہا کہ مدعیان پر نئی شرائط نافذ نہیں کی جا سکتی۔ اے ایس آئی کوئی نجی ادارہ نہیں ہے بلکہ ایک حکومتی ادارہ ہےاور حکومت کا کام کر رہا ہے۔ یہ غیر درست ہے کہ کسی کو بھی سروے کا خرچ بھرنے پر مجبور کیا جائے۔
مشرا نے مزید کہا کہ عدالت نے ہندو فریقین کی بھی درخواست سنی جس میں انہوں نے کہا تھا کہ مسجد کے وضو خانہ کا بھی سروے کیا جائے۔ کورٹ نے اس معاملے کی سماعت کو ۵؍ اکتوبر تک ملتوی کر دیا ہے۔