منشیات کی اسمگلنگ، تیل اور نقل مکانی جیسے معاملات پر واشنگٹن سے بات چیت کیلئے تیار ہیں : نکولس مادورو

وینزویلا کے صدر نکولس مادورو کا کہنا ہے کہ ان کا ملک امریکہ کے ساتھ بات چیت اور تعاون کے لئے تیار ہے، تاہم انہوں نے حالیہ مبینہ امریکی حملے سے متعلق سوال کا براہِ راست جواب نہیں دیا۔ 
میڈیا رپورٹس کے مطابق وینزویلا کے صدر نکولس مادورو کا یہ بیان ایسے وقت سامنے آیا ہے جب وینزویلا کو گزشتہ چند ہفتوں سے امریکی فوجی دباؤ کا سامنا ہے۔ رپورٹس کے مطابق ریاستی ٹی وی کو دیئے گئے ایک انٹرویو میں صدر مادورو نے امریکہ کے ساتھ مذاکرات کے امکان پر بات کرتے ہوئے کہا کہ منشیات کی اسمگلنگ، تیل اور نقل مکانی جیسے معاملات پر واشنگٹن کے ساتھ بات چیت کیلئے تیار ہیں۔ 
صدر مادورو نے امریکی صدر ڈونالڈ ٹرمپ کے اس دعوے کی نہ تو تصدیق کی اور نہ ہی تردید کی جس میں کہا گیا تھا کہ امریکہ نے وینزویلا میں منشیات بردار کشتیوں کے لئے استعمال ہونے والی ایک ڈاکنگ سہولت کو نشانہ بنایا ہے۔ اس سلسلےمیں  ایک سوال پر مادورو نے کہا کہ یہ ایسا معاملہ ہو سکتا ہے جس پر ہم چند دن بعد بات چیت کریں گے۔ اگر تصدیق ہو جاتی ہے تو یہ کارروائی لاطینی امریکہ سے منشیات کی اسمگلنگ کے خلاف امریکی مہم کے دوران پہلا زمینی حملہ تصور کی جائے گی۔ 
رپورٹس کے مطابق امریکی صدر نے پیر کوکہا تھا کہ امریکہ نے وینزویلا میں مبینہ منشیات بردار کشتیوں کے لئے استعمال ہونے والی ایک ساحلی ڈاک کو تباہ کر دیا ہے۔ ٹرمپ نے یہ واضح نہیں تھا کہ یہ کارروائی فوج نے انجام دی یا سی آئی اے نےاور نہ ہی حملے کے مقام کی تفصیل بتائی۔ فلوریڈا میں واقع اپنے مارا لاگو ریزورٹ میں صحافیوں سے گفتگو کرتے ہوئے انہوں نے کہا تھا کہ ڈاک کے علاقے میں ایک بڑا دھماکہ ہوا جہاں منشیات سے بھری کشتیوں کو تیار کیا جاتا تھا۔