پولیس اور بی ایم سی میں شکایت کی کہ دیوار کافی اونچی بنائی جارہی ہے جس سے گھروں میں ہوا اورروشنی کا مسئلہ ہوگا

یہاں   برکت علی ناکہ کے قریب اسپتال کی زیرتعمیر   بلڈنگ کی حفاظتی دیوار  کےخلاف مقامی افراد نے احتجاج کرتے ہوئے بی ایم سی اور پولیس اسٹیشن میں شکایت درج کرائی ہے کہ بلڈنگ کی حد بندی سے باہر کافی اونچی دیوار تعمیر کرنے سے انھیں   تکلیفوں کا سامنا کرنا پڑسکتا ہے ۔ ان کی شکایت پر پولیس کی مداخلت کے بعد بی ایم سی کے افسران نے جائے وقوع کا معائنہ کرتے ہوئے جانچ کرنے اور اعلیٰ افسران کو رپورٹ پیش کرنے کی یقین دہانی کرائی ہے ۔ 
 وڈالا کے برکت علی ناکہ کے قریب آنند واڑی آر، جے گائیکواڑ( دادا) مارگ پر ایک چیریٹبل فاؤنڈیشن ٹرسٹ کے ذریعے   اسپتال  تعمیر کیا جارہا ہےجس کی چہار دیواری کافی اونچی تعمیر کی جارہی ہے ۔ اس پر آنند واڑی رہیواسی سنگھ  کے ممبران کا الزام ہے کہ حفاظتی  دیوار اسپتال کی جگہ سے ایک فٹ باہران کی جانب اٹھائی جارہی ہے ۔ اس کے علاوہ دیوار ۳۰؍ فٹ سے زائد اونچی بنائی جارہی ہے جس کی وجہ سے ان کے گھروں میں ہوا اور روشنی وغیرہ کے گزربسر کامسئلہ پیدا ہورہا ہے اور لوگ اس کی وجہ سے بیمار ہو رہے ہیں  ۔  آنندواڑی رہیواسی سیوا سنگھ کے صدر مہندر آر گائیکواڑ نے کہا کہ ان کے گھروں کے سامنے بنائی جانے والی وال باؤنڈری کے خلاف تقریباً ۱۰۰؍ مکینوں نےوڈالا پولیس اسٹیشن کے باہر احتجاج کرتے ہوئے دیوارکے تعمیراتی کام کو روکنے  کی کوشش کی ۔ اس کے بعد پولیس نے بی  ایم سی کے متعلقہ افسران کو بلاکر معاملے کی چھان بین اور اس کی تفتیش کیلئے کہا ہے ۔
  بی ایم سی کے افسران نے جائے وقوع کا معائنہ کیا اور یقین دہانی کرائی کہ اس معاملے کی جانچ کی جائے گی ۔
  اس سلسلے میں دیوار تعمیر کرنے والے کنٹریکٹر اور اسپتال کے ذمہ داران سے بھی گفتگو کرنے کی کوشش کی گئی مگر رابطہ نہیں ہوسکا ۔