عثمان ڈیمبیلے، کارلوس الکاراز ،لینڈونورس ،سمر میکنٹوش اوردیگر کئی ایسے ایتھلیٹ رہے جنہوں نے۲۰۲۵ء میں نئےسنگ میل قائم کئے اور کھیلوں کے افق پرنمایاں رہے۔

میدان کوئی بھی ہو، ان ستاروں کی چمک نے سب کو پیچھے چھوڑ دیا، ریکارڈ ٹوٹ گئے، تاریخ نے نیا موڑ لیا اور عالمی کھیلوں کے افق پر نئے چمپئن طلوع ہوئے۔ یہ وہ لمحات تھے جب تماشائیوں کی سانسیں تھم گئیں ، کامیابی نے عزم و محنت کے سامنے سر جھکا دیا۔۲۰۲۵ء نے ثابت کر دیا کہ جب حوصلہ حدوں کو چھو لے تو کھیل، تاریخ بن جایا کرتا ہے۔
عثمان ڈیمبیلے (فرانس، فٹ بال) :فرانسیسی  مسلم اسٹرائیکر عثمان ڈیمبیلے کیلئے یہ سال کسی خواب سے کم نہ تھا۔ پیرس سینٹ جرمین( پی ایس جی)کیلئے ۳۵؍ گول داغ کر انہوں نے ٹیم کو پہلی بار چمپئن لیگ جتوائی۔ ان کی غیر معمولی کارکردگی پر انہیں بیلن ڈی اور اور فیفا کے بہترین کھلاڑی کے اعزاز سے نوازا گیا۔

 کارلوس الکاراز (اسپین، ٹینس):ٹینس کی دنیا میں اسپین کے کارلوس الکاراز کا طوطی بول رہا ہے۔ فرینچ اوپن اور یو ایس اوپن جیت کر وہ سال کے اختتام پر نمبر ایک پوزیشن پر براجمان رہے۔۷۱؍ فتوحات اور محض۹؍شکستوں کے ساتھ ان کا یہ سال بے مثال رہا جس میں انہوں نے مجموعی طور پر۶؍ گرینڈ سلیم ٹائٹل کا ہندسہ عبور کیا۔

ایلیا مالینن (امریکہ، فگر اسکیٹنگ):فگر اسکیٹنگ میں امریکہ کے ایلیا مالینن نے وہ کر دکھایا جو آج تک کوئی نہ کر سکا۔ وہ تاریخ کے پہلے کھلاڑی بن گئے جنہوں نے ایک ہی پروگرام میں ۷؍کواڈروپل جمپس (Quadruple Jumps) لگا کر۲۳۸ء۲۴؍ پوائنٹس کا نیا عالمی ریکارڈ قائم کیا۔

 چن یوشی (چین، ڈائیونگ): چین کی چن یوشی نے ورلڈ ایکواٹک چمپئن شپ میں تین گولڈ میڈل جیت کر ڈائیونگ کی تاریخ بدل دی۔ وہ لگاتار چار بار انفرادی ورلڈ ٹائٹل جیتنے والی دنیا کی پہلی ڈائیور بن گئیں۔ ان کی اس شاندار کارکردگی پر انہیں فی میل ڈائیونگ ایتھلیٹ آف دی ایئر قرار دیا گیا۔

 ارمانڈ ڈوپلانٹس (سویڈن، ایتھلیٹ):پول والٹ کے بے تاج بادشاہ ارمانڈ ڈوپلانٹس  نے ۲۰۲۵ء میں چار بار اپنا ہی عالمی ریکارڈ توڑا۔ ٹوکیو میں ۶ء۳۰؍میٹر کی بلندی عبور کر کے انہوں نے ثابت کیا کہ ان کا مقابلہ صرف خود سے ہے۔ وہ اس سیزن میں تمام۱۶؍ مقابلوں میں ناقابلِ شکست رہے اور ورلڈ ایتھلیٹ آف دی ایئر منتخب ہوئے۔

 فیتھ کیپیگون (کینیا، ایتھلیٹ):کینیا کی فیتھ کیپیگون نے خواتین کی۱۵۰۰؍میٹر دوڑ میں اپنی حکمرانی برقرار رکھی۔ انہوں نے نہ صرف مسلسل تیسرا  عالمی خطاب جیتا بلکہ۴۸ء۶۸:۳  کے وقت کے ساتھ اپنا ہی عالمی ریکارڈ پاش پاش کر دیا۔

 سمرمیکنٹوش (کینیڈا، تیراکی):کینیڈا کی تیراک سمر میکنٹوش نے پول میں آگ لگا دی۔ انہوں  نے ۲۰۰؍ اور۴۰۰؍ میٹر کے مختلف مقابلوں میں عالمی ریکارڈز قائم کئے اور سنگاپور میں ہونے والی ورلڈ چمپئن شپ میں چار گولڈ میڈل اپنے نام کر کے دنیا کو حیران کر دیا۔

 تدیج پوگاچر (سلووینیا، سائیکلنگ):سائیکلنگ کی دنیا میں تدیج پوگاچر نے چوتھی بار ٹور ڈی فرانس جیت کر اپنی برتری ثابت کر دی۔ اس کے علاوہ انہوں نے روانڈا میں ورلڈ چمپئن شپ اور فرانس میں یورپی چمپئن شپ جیت کر اپنی فتوحات کی ہیٹ ٹرک مکمل کی۔

 شائی گلجیئس الیگزینڈر (کینیڈا، باسکٹ بال):باسکٹ بال کے میدان میں شائی نے اوکلاہوما سٹی تھنڈر کو این بی اے(این بی اے)چمپئن بنا دیا۔ وہ باسکٹ بال کی تاریخ کے چوتھے کھلاڑی بن گئے جنہوں نے ایک ہی سیزن میں ایم وی پی (ایم وی پی)، اسکورنگ ٹائٹل اور فائنل ایم وی پی کے تمام اعزازات سمیٹے۔

 لینڈو نورس (برطانیہ، فارمولا ون) :برطانوی ڈرائیور لینڈو نورس نے میکس ورسٹاپن کی چار سالہ بالادستی کا خاتمہ کرتے ہوئے اپنی پہلی فارمولا ون ورلڈ چمپئن شپ جیت لی۔۷؍ فتوحات اور۱۸؍ بار پوڈیم پر جگہ بنا کر انہوں نے ثابت کیا کہ وہ رفتار کے نئے سلطان ہیں۔