بالی ووڈ اداکار اکشے کمارنے اپنی اہلیہ اور مصنفہ ٹوئنکل کھنہ کے ساتھ گھریلو زندگی سے متعلق ایک دلچسپ انکشاف کیا ہے۔ ایک حالیہ میڈیا انٹرویو میں اکشے کمار نے بتایا کہ گھر کے تقریباً تمام اہم فیصلوں میں ٹوئنکل کھنہ کی رائے حتمی ہوتی ہے۔

بالی ووڈ اداکار اکشے کمارنے اپنی اہلیہ اور مصنفہ  ٹوئنکل کھنہ  کے ساتھ گھریلو زندگی سے متعلق ایک دلچسپ انکشاف کیا ہے۔ ایک حالیہ میڈیا انٹرویو میں اکشے کمار نے بتایا کہ گھر کے تقریباً تمام اہم فیصلوں میں ٹوئنکل کھنہ کی رائے حتمی ہوتی ہے، جبکہ انہیں کبھی کبھار صرف  گیجٹس  سے متعلق فیصلے کرنے کی آزادی حاصل ہوتی ہے۔اکشے کمار نے  فلم فیئر  کے ساتھ گفتگو میں اپنی اور ٹوئنکل کھنہ کی گھریلو فیصلہ سازی کے بارے میں مزاحیہ انداز میں بات کرتے ہوئے کہا کہ گھر میں تقریباً تمام فیصلے ان کی اہلیہ کرتی ہیں۔ انہوں نے واضح کیا کہ گیجٹس سے متعلق کچھ معاملات ایسے ہیں جن میں انہیں اپنی رائے کے مطابق فیصلہ کرنے کا موقع مل جاتا ہے، لیکن باقی معاملات میں حتمی فیصلہ ٹوئنکل کا ہی ہوتا ہے۔  اکشے کے مطابق اگر کسی معاملے کا تعلق کسی گیجٹ سے ہو تو وہ ٹوئنکل سے بات کرکے اپنی پسند کا فیصلہ کر سکتے ہیں، لیکن گھر کے دیگر معاملات میں فیصلہ کرنے کی ذمہ داری عموماً ٹوئنکل کھنہ کے پاس رہتی ہے۔

یہ بھی پڑھئے:غزہ کی مہلک ناکہ بندی کیخلاف ایک اور فلوٹیلا مہم

اکشے کمار کے اس بیان نے میاں بیوی کے درمیان  ڈسیزن میکنگ  اور گھریلو ذمہ داریوں کی تقسیم پر بھی توجہ مبذول کرائی ہے۔ ماہر نفسیات ڈاکٹر رِمپا سرکار کے مطابق، کسی رشتے میں ہر فیصلہ دونوں افراد کا برابر طور پر کرنا ضروری نہیں ہوتا۔ اصل اہمیت اس بات کی ہے کہ دونوں ساتھی اس انتظام پر متفق ہوں، ایک دوسرے کی رائے کا احترام کریں اور ضرورت پڑنے پر فیصلوں کے طریقہ کار میں لچک دکھائیں۔ 
ماہر کے مطابق، جوڑوں کے درمیان اختلافات اس وقت پیدا ہوسکتے ہیں جب دونوں کی ترجیحات، بات چیت کا انداز، مالی معاملات سے متعلق سوچ یا ذمہ داریوں کے بارے میں توقعات مختلف ہوں۔ اگر وقت کے ساتھ ایک شخص ہر معاملے میں مستقل طور پر فیصلہ کرنے والا بن جائے اور دوسرا خود کو نظرانداز یا بے اختیار محسوس کرنے لگے تو اس سے رشتے میں ناراضی یا دوری پیدا ہوسکتی ہے۔  اکشے کمار کے بیان سے یہ تاثر نہیں ملتا کہ ان کے اور ٹوئنکل کھنہ کے درمیان کسی قسم کا تنازع ہے۔ بلکہ اداکار نے اس معاملے کو ہلکے پھلکے اور مزاحیہ انداز میں پیش کیا، جس سے ان دونوں کے درمیان باہمی سمجھ بوجھ اور ایک دوسرے کے کردار کی قبولیت کا اندازہ ہوتا ہے۔

یہ بھی پڑھئے:اداکارہ مدھوبالا نے اپنی دلکش اداؤں سے پردۂ سیمیں کو سجایا

ٹوئنکل کھنہ بالی ووڈ میں اداکاری کے بعد ایک  مصنفہ، کالم نگار اور پروڈیوسر  کے طور پر اپنی شناخت بنا چکی ہیں۔ اکشے کمار اس سے پہلے بھی کئی مواقع پر ٹوئنکل کی بے باک رائے اور تنقیدی انداز کا ذکر کرچکے ہیں۔ جولائی ۲۰۲۶ء میں بھی اکشے نے انہیں اپنی ’’سخت ناقد‘‘ قرار دیتے ہوئے کہا تھا کہ ان کی منظوری ان کے لیے خاص اہمیت رکھتی ہے۔  اکشے کمار اور ٹوئنکل کھنہ کی شادی کو کئی برس گزر چکے ہیں اور دونوں اپنے دو بچوں  آراو   اور  نتارا  کے والدین ہیں۔ دونوں اپنی نجی زندگی کو زیادہ تر میڈیا کی توجہ سے دور رکھتے ہیں، تاہم کبھی کبھار ان کے انٹرویوز میں ان کی ازدواجی زندگی کی دلچسپ جھلکیاں سامنے آتی رہتی ہیں۔