آسٹریلیا کیخلاف سبینا پارک میں اپنا آخری میچ کھیلیں گے۔

ویسٹ انڈیز کے آل راؤنڈر آندرے رسل نے بین الاقوامی کرکٹ سے ریٹائرمنٹ کا اعلان کردیا ہے۔ آسٹریلیا اور ویسٹ انڈیز کے درمیان آئندہ ۵؍ میچوں کی ہوم ٹی۔ ۲۰؍ سیریز کے پہلے ۲؍ میچ ٹیم کیلئے ان کے آخری میچ ہوں گے۔ ۳۷؍ سالہ رسل کو ۵؍ میچوں کی سیریز کیلئے ونڈیز ٹیم میں شامل کیا گیا ہے۔ اس سیریز کے پہلے ۲؍ میچ جمائیکا کے سبینا پارک میں کھیلے جائیں گے جو اس آل راؤنڈر کا ہوم گراؤنڈ ہے۔ ونڈیز کرکٹر نے اپنے ریٹائرمنٹ کی خبر سوشل میڈیا پوسٹ کے ذریعے دی۔ 
آسٹریلیا کے خلاف ویسٹ انڈیز کی ۱۶؍رکنی ٹیم میں شامل آندرے رسل ۲۰؍جولائی سے شروع ہونے والی ٹی۔ ۲۰؍ سیریز کے دوران انٹرنیشنل کرکٹ سے ریٹائر ہو جائیں گے، وہ گزشتہ سال کے آخر میں انجری کے باعث انگلینڈ کے خلاف ٹیم کا حصہ نہیں بن سکے تھے۔ آندرے رسل، ۲؍ بار کے عالمی چمپئن ۲۰۱۲ءاور ۲۰۱۶ءمیں آئی سی سی ٹی۔ ۲۰؍ ورلڈ کپ جیتنے والی ٹیم کا حصہ تھے۔ 
آندرےرسل ویسٹ انڈیز کی نمائندگی کرنے پر شکر گزار ہیں اور انہوں نے ایک دہائی سے زائد عرصے تک قومی جرسی پہننے پر فخر کا اظہار کیا۔ انہوں نے کرکٹ ویسٹ انڈیز سے کہاکہ ’’لفظ بیان نہیں کر سکتے کہ اس کا میرے لئے کیا مطلب ہے۔ ویسٹ انڈیز کی نمائندگی کرنا میری زندگی کی سب سے قابل فخر کامیابیوں میں سے ایک ہے۔ جب میں بچہ تھا، مجھے اس سطح تک پہنچنے کی امید نہیں تھی لیکن جیسے ہی آپ کھیلنا شروع کرتے ہیں اور کھیل سے محبت کرتے ہیں، آپ کو احساس ہوتا ہے کہ آپ کیا حاصل کر سکتے ہیں۔ ‘‘
رسل، جو ۲؍ بار کی عالمی چمپئن ٹیم کا حصہ تھے، نے ہوم کراؤڈ کے سامنے اپنے کرئیر کو ختم کرنے کی بات کی اور امید ظاہر کی کہ وہ کھیل کو یادگار الوداعی دیں گے۔ جمائیکا کے کھلاڑی نے کہا کہ مجھے ویسٹ انڈیز کے لئے کھیلنا پسند ہے اور میں اپنے گھر والوں اور دوستوں کے سامنے گھر پر کھیلنا پسند کرتا ہوں جہاں مجھے اپنی صلاحیتوں کو ظاہر کرنے اور بہتر کارکردگی دکھانے کا موقع ملتا ہے، میں اپنے بین الاقوامی کریئر کا شاندار اختتام کرنا چاہتا ہوں اور کیریبین ممالک سے آنے والے کرکٹرز کی اگلی نسل کے لئے رول ماڈل بننا چاہتا ہوں۔