سابق عالمی نمبر ایک  اور ۲۰۱۸ء کے چانگون ورلڈ چمپئن انکور متل نے ۱۶؍ویں ایشین شوٹنگ چمپئن شپ کے دوران ڈبل ٹریپ مقابلے میں طلائی تمغہ جیت کر ایشیائی چمپئن شپ کا نیا ریکارڈ قائم کیا۔

سابق عالمی نمبر ایک  اور ۲۰۱۸ء کے چانگون ورلڈ چمپئن انکور متل نے ۱۶؍ویں ایشین شوٹنگ چمپئن شپ کے دوران ڈبل ٹریپ مقابلے میں طلائی تمغہ جیت کر ایشیائی چمپئن شپ کا نیا ریکارڈ قائم کیا۔ انکور کی جیت کے ساتھ قزاخستان  کے شمکینٹ میں جاری مقابلے میں ہندوستان کے کُل تمغوں کی تعداد ۱۰۳؍ تک پہنچ گئی۔ یہ ہندوستان کی ۵۲؍ طلائی، ۲۶؍چاندی اور ۲۵؍کانسے کے تمغوں کے ساتھ اب تک کی بہترین کارکردگی ہے۔
 انکور متل نے بھانو پرتاپ سنگھ اور ہرش وردھن کاویہ کے ساتھ ڈبل ٹریپ ٹیم ایونٹ میں ٹیم کانسے کا تمغہ بھی جیتا تھا۔ انکور نے ۴؍ راؤنڈ میں  (ہر ایک میں ۳۰؍شاٹس)  میں ۲۶، ۲۸، ۲۶؍اور ۲۷؍پوائنٹس  حاصل کرتے ہوئے کل ۱۰۷؍ ہٹ کے ساتھ سونے کا تمغہ جیتا۔ قزاخستان کے مقامی شوٹر آرٹیوم چکولائیف نے ۹۸؍پوائنٹس کے ساتھ چاندی کا تمغہ جیتا جبکہ کویت کے احمد الفاسی نے شوٹ آف میں ۹۶؍  پوائنٹس کے ساتھ کانسے کا تمغہ جیتا۔
 ڈبل ٹریپ جونیئر زمرہ میں حاتم خان محمد نے ۸۹؍ ہٹ کے ساتھ چاندی کا تمغہ اپنے نام کیا جبکہ مانوراج سنگھ چڈاسما نے ۸۷؍ہٹ کے ساتھ کانسے کا تمغہ جیتا۔ ان دونوں نے ونے پرتاپ سنگھ چندراوت (۸۱) کے ساتھ اس ایونٹ کا ٹیم گولڈ بھی جیتا تھا۔
 ڈبل ٹریپ خواتین کے زمرے میں ہندوستان نے  پوڈیم کلین سویپ کرتے ہوئے سونے، چاندی اور کانسے کے تمغے اپنے نام کئے۔ انوشکا سنگھ بھاٹی (۹۳) نے گولڈ، راجکمار پرنیل انگلے (۸۹) نے چاندی اور یشایا حافظ کنٹریکٹر (۸۷) نے کانسے کا تمغہ جیتا ہے۔ ان تینوں نے ٹیم کا طلائی تمغہ بھی جیتا۔ خواتین کے جونیئر زمرے میں اونی الانکر کولی نے ۷۷؍ ہٹ کے ساتھ کانسے کا تمغہ جیتا۔ اونی نے کرشیکا جوشی اور سمیتا ساونت (دونوں ۶۱؍ہٹ) کے ساتھ ٹیم سلور بھی جیتا۔