ہندوستان کی خواتین ہاکی ٹیم نے شاندار کھیل کا مظاہرہ کرتے ہوئے تھائی لینڈ کو ۱۱۔ صفرسے شکست دے کر ایشیا کپ میں اپنے مہم کی بہترین شروعات کی۔

ہندوستان کی خواتین ہاکی ٹیم نے شاندار کھیل کا مظاہرہ کرتے ہوئے تھائی لینڈ کو ۱۱۔ صفرسے شکست دے کر ایشیا کپ میں اپنے مہم کی بہترین شروعات کی۔ 
ہندوستان کی جانب سے ممتاز خان (۷؍ ویں، ۴۹؍ویں منٹ)، ادیتا (۳۰؍ویں، ۵۲؍ویں منٹ) اور بیوٹی ڈُنگ ڈُنگ (۴۵؍ویں، ۵۴؍ ویں منٹ) نے ۲۔ ۲؍ گول کئے جبکہ سنگیتا کماری (۱۰؍ویں )، نوینیت کور (۱۶؍ویں )، لالریمسیا می (۱۸؍ویں )، شرمیلا دیوی (۵۷؍ویں ) اور رتوجا داداسو پسل (۶۰)نے ایک۔ ایک گول کیا۔ 
پہلے کوارٹر میں ممتاز خان (۷؍ویں منٹ) اور سنگیتا کماری (۱۰؍ویں منٹ) کے ۲؍ فیلڈ گول کی بدولت ہندوستان نے ابتدا سے ہی دباؤ بنا لیا۔ دوسرے کوارٹر میں ہندوستان نے جارحانہ کھیل جاری رکھتے ہوئے مزید ۳؍ گول کئے۔ تجربہ کار فارورڈ نوینیت کور نے (۱۶؍ویں منٹ) اور مڈفیلڈر لالریمسیا می نے (۱۸؍ویں منٹ) مسلسل ۲؍ فیلڈ گول داغے جبکہ ادیتا نے (۳۰؍ویں منٹ) پنالٹی کارنر پر گول کرکے پہلے ہاف کا اختتام شاندار انداز میں کیا۔ 
دوسرے ہاف میں بھی ہندوستان نے تھائی لینڈ کے دائرے میں مسلسل حملے جاری رکھے اور تیسرے کوارٹر میں ۴؍ پنالٹی کارنر حاصل کئے جن میں سے بیوٹی ڈُنگ ڈُنگ نے (۴۵؍ویں منٹ) میں پہلا گول کیا۔ میچ کے آخری کوارٹر میں ہندوستان نے لگاتار ۵؍ گول کر کے اپنے پہلے مقابلے میں بڑی کامیابی درج کی۔ ممتاز خان، ادیتا اور شرمیلا دیوی نے پنالٹی کارنر پر گول کئے جبکہ بیوٹی ڈُنگ ڈُنگ اور رتوجا داداسو پسل نے فیلڈ گول اسکور کئے۔ ہندوستان کی ٹیم اب سنیچر کو جاپان سے مقابلہ کرے گی۔