میونسپل کمشنر و ایڈمنسٹریٹر  انمول ساگر  نے میونسپل اسکولوں کی تعلیمی کارکردگی پر سخت ناراضگی ظاہر کرتے ہوئے واضح کیا ہے کہ جن اسکولوں کے تعلیمی نتائج اوسط سطح سے بھی کم ہیں، ان اسکولوں کے ہیڈ ماسٹروں کے خلاف کارروائی کی جائے گی۔میونسپل کمشنر نے کہا کہ ’’ناقص نتائج سیدھے طور پر اسکول انتظامیہ کی ذمہ داری ظاہر کرتے ہیں، طلبہ کے مستقبل سے کوئی سمجھوتہ نہیں ہوسکتا۔‘‘

کمشنر نے افسران کو ہدایت دی کہ پی اے ٹی میں کمزور نتائج دینے والے اسکولوں کی اسکول وار رپورٹ فوری طور پر پیش کی جائے اور خراب تعلیمی نتائج والے اسکولوںکے ہیڈ ماسٹروں کی جواب دہی طے کی جائے۔ انہوں نے کہا کہ مسلسل کمزور نتائج اس بات کا ثبوت ہیں کہ تدریسی عمل میں خامیاں موجود ہیں، جنہیں فوری طور پر درست کرنا ضروری ہے۔یہ سخت مؤقف انہوں نے تعلیمی سال۲۵۔۲۰۲۶ءکیلئے منعقدہ محکمۂ تعلیم کی جائزہ میٹنگ میں اختیار کیا، جس میں شہر کی میونسپل اسکولوں کی کارکردگی، طلبہ کے ڈراپ آؤٹ، تدریسی معیار، پی اے ٹی امتحانات ، ’اثر‘ رپورٹ(طلبہ کی کارکردگی پر اقدامات کے اثرات کا جائزہ) اور ’نِپُن بھارت‘(بچوں کی پڑھنے، سمجھنے اور حساب میں مہارت کے لئے قومی مہم) کے اہداف کا تفصیلی جائزہ لیا گیا۔

 تعلیمی معیار بہتر بنانے کے لئے ’فلائنگ اسکوڈا ‘ تشکیل 

طلبہ کی تعلیمی سطح جانچنے کیلئے کمشنر نے کلاس ۳؍اور۵؍کے لئےسینئر افسران پر مشتمل ’فلائنگ اسکواڈ‘ تشکیل دینے کے احکامات جاری کئے، جو اسکولوں میں اچانک معائنہ کرکے تدریسی معیار، طلبہ کی سیکھنے کی سطح اور اسکول انتظامیہ کی جدوجہد کا جائزہ لے گا۔

 

 

 خستہ حال اسکولوں کا معائنہ اور مرمت کی تیاری

میٹنگ میں ان اسکولوں کا بھی ذکر ہوا جن کی عمارتیں خستہ حال ہو چکی ہیں۔ کمشنر نے افسران کو ان اسکولوں کا موقع پر معائنہ کرکے تفصیلی رپورٹ تیار کرنے کی ہدایت دیتے ہوئے کہا کہ مرمت کیلئے ڈسٹرکٹ پلاننگ فنڈ سے تجاویز پیش کی جائیں۔

 

 

 مڈ ڈے میل میں غذائیت کا اضافہ

  کمشنر نے میونسپل اسکولوں کے مڈ ڈے میل میں پروٹین سے بھرپور غذا اور تازہ پھل شامل کرنے کی بھی سخت تاکید کی، تاکہ بچوں کو صحت مند اور متوازن خوراک فراہم کی جاسکے۔ میٹنگ میں ایڈیشنل میونسپل کمشنر نینا سسّانے، ڈپٹی کمشنر (تعلیم)  بال کرشن شیر ساگر، انتظامی افسر سوداگر شیکھرے اور محکمۂ تعلیم کے افسران و ملازمین موجود تھے۔