اسپینش کھلاڑی الکاراز نے شاندار مظاہرہ کرتے ہوئے کوارٹر فائنل میں ٹامی پال کو شکست دے دی۔

عالمی نمبر دو کھلاڑی اور موجودہ  چمپئن  کارلوس الکاراز نے بدھ کو امریکی ٹامی پال کو ہرا کر فرنچ اوپن کے سیمی فائنل میں جگہ بنا لی ہے۔ وہیں خواتین کے زمرے میں  امریکی کی کوکو گاف نے بھی ٹورنامنٹ کے اگلے راؤنڈ میں جگہ بنا لی ہے۔خیال رہے کہ گاف سے پہلے پولینڈ کی اسٹار ایگا سواتیک اور عالمی نمبر ون ٹینس کھلاڑی آریانا سبالینکا نے بھی سیمی فائنل میں جگہ بنائی تھی۔  
 اسپین کے سرکردہ کھلاڑی الکاراز نے ٹامی پال پر ایک گھنٹہ۳۴؍ منٹ تک جاری رہنے والے میچ  میں ۰۔۶، ۱۔۶، ۴۔۶؍ سےشاندارکامیابی حاصل کرتے ہوئے رولاگیروس میں لگاتار تیسرے سیمی فائنل میں داخلہ حاصل کیا۔ سیمی فائنل میں الکاراز کا مقابلہ اٹلی کے لورینزو میوسیٹی  سے ہوگا۔ اٹلی کے ٹینس کھلاڑی لورینزو میوسیٹی نے فرنچ اوپن میں امریکی کھلاڑی ٹیافو کو  ۲۔۶، ۶۔۴، ۵۔۷، ۲۔۶؍ سے ہرا کر سیمی فائنل میں جگہ بنائی۔ میوسیٹی نے پہلی بار فرنچ اوپن کے سیمی فائنل میں داخلہ حاصل کیا ہے۔ بدھ کو تیسری سیڈیافتہ کوکو گاف نے سست شروعات اور پہلے سیٹ میں ٹائی بریکر میں ہار سے ابھر کر ہم وطن میڈیسن کیز کو۷۔۶، ۴۔۶، ۱۔۶؍  سے ہرا کر سیمی فائنل میں جگہ بنائی۔خیال ر ہے کہ  منگل کو  خواتین کے زمرے میں پولینڈ کی اسٹار ٹینس کھلاڑی ایگا سواتیک نے کوارٹر فائنل میں یوکرین کی ایلینا سویتولینا کو۱۔۶، ۵۔۷؍ سے ہرا کر سیمی فائنل میں داخلہ حاصل کیا۔ سیمی فائنل میں سواتیک کا مقابلہ بیلاروس کی آریانا سبالینکا سے ہوگا۔