انڈین ویٹ لفٹر متھوپنڈی راجہ نے کامن ویلتھ گیمز ۲۰۲۶ء میں مردوں کے ۶۵؍ کلوگرام زمرے کے مقابلے میں مجموعی طور پر۲۸۶؍ کلوگرام وزن اٹھا کر چاندی کا تمغہ اپنے نام کر لیا۔

انڈین ویٹ لفٹر متھوپنڈی راجہ نے کامن ویلتھ گیمز  ۲۰۲۶ء میں مردوں کے ۶۵؍ کلوگرام زمرے کے مقابلے میں مجموعی طور پر۲۸۶؍ کلوگرام وزن اٹھا کر چاندی کا تمغہ اپنے نام کر لیا۔ اتوار کی دیر رات ہوئے مقابلے میں ۲۵؍ سالہ ویٹ لفٹر راجا متھوپنڈی نے مردوں کے ۶۵؍ کلوگرام زمرے میں کل  ۲۸۶؍ کلوگرام (۱۲۷؍ کلوگرام سنیچ اور ۱۵۹؍ کلوگرام کلین اینڈ جرک) وزن اٹھایا۔ کامن ویلتھ گیمز میں ہندوستان کا یہ چوتھا تمغہ ہے۔ ملائیشیا کے محمد اجنل بدین نے  ۲۹۹؍ کلوگرام وزن اٹھا کر ریکارڈ کارکردگی کے ساتھ سونے کا تمغہ جیتا، جبکہ پاپوا نیو گنی کے موریا بارو نے کانسی کا تمغہ حاصل کیا۔

یہ بھی پڑھئے:ہند امریکہ تجارتی معاہدہ کی جلد تکمیل کی کوشش پھر تیز

واضح رہے کہ تمل ناڈو کے متھوپنڈی راجہ ۱۲؍ جنوری ۲۰۰۰ء کو پیدا ہوئے تھے اور وہ انڈین ریلویز کی نمائندگی کرتے ہیں۔ انہوں نے ۲۰۱۷ء کی کامن ویلتھ یوتھ/جونیئر چیمپئن شپ میں سونے اور چاندی کے تمغے جیت کر اپنی شناخت بنائی اور پھر ۲۰۱۹ء اور ۲۰۲۲ء میں قومی خطابات جیتے۔ ۲۰۲۴ء میں، انہوں نے ۶۱؍ کلوگرام زمرے  میں مجموعی طور پر ۲۸۹؍ کلوگرام وزن اٹھا کر قومی ریکارڈ توڑا۔

یہ بھی پڑھئے:’’حالات کیسے بھی ہوں، میں پُرسکون رہنے کی کوشش کرتی ہوں‘‘

۲۰۲۵ء میں، انہوں نے کامن ویلتھ چیمپئن شپ میں ۲۹۶؍ کلوگرام وزن اٹھا کر چاندی کا تمغہ جیتا اور ناروے کے فورڈے میں منعقدہ ورلڈ چیمپئن شپ میں ۲۹۹؍ کلوگرام (۱۳۰؍ کلوگرام اسنیچ اور ۱۶۹؍ کلوگرام کلین اینڈ جرک) کا اپنا نیا ذاتی بہترین اسکور بنایا۔ اس چیمپئن شپ میں وہ ۶۵؍ کلوگرام کیٹیگری میں نویں نمبر پر رہے، جس کی بدولت وہ لاس اینجلس ۲۰۲۸ء کی طرف بڑھتے ہوئے ہندوستان کے بہترین مرد ویٹ لفٹرز میں سے ایک بن گئے ہیں۔