ہندوستانی آل راؤنڈر دیپتی شرما نے سری لنکا کے خلاف سیریز کے پانچویں اور آخری ٹی ٹوئنٹی میچ میں تاریخی کارنامہ انجام دیتے ہوئے ویمنز ٹی ٹوئنٹی انٹرنیشنل کرکٹ میں سب سے زیادہ وکٹیں لینے والی بولر کا اعزاز حاصل کر لیا۔انٹرنیشنل کرکٹ کونسل (آئی سی سی) کی ویب سائٹ کے مطابق۲۸؍سالہ دیپتی شرما نے آسٹریلیا کی میگن شٹ کو پیچھے چھوڑتے ہوئے۱۵۲؍ وکٹیں مکمل کرلی ہیں۔دیپتی نے ۱۳۳؍ میچوں میںیہ کارنامہ انجام دیا ہےجبکہ میگن شٹ کی۱۲۳؍ میچوں میں۱۵۱؍ وکٹ ہیں۔ انہوں  نے ۱۴؍ ویںاوور میں نیلاک شیکا سلوا کو ایل بی ڈبلیو آؤٹ کر کے اپنی ۱۵۲؍ ویں وکٹ حاصل کی۔ٹی ٹوینٹی کےمردوں اور خواتین کے فارمیٹ میںدیپتی کا یہ بھی تاریخی ریکارڈ ہےکہ انہوں نے۱۵۰؍ سے زائد وکٹ لینے کے علاوہ ایک ہزار سے زائد رن بھی بنائے ہیں۔

دیپتی نے اب تک۱۳۳؍ ٹی ٹوینٹی انٹرنیشنل میچوں میں ۱۹؍ کے شاندار اوسط سے وکٹیں حاصل کی ہیں جو مختصر فارمیٹ میں ان کی مستقل مزاجی کو ظاہر کرتا ہے۔ ان کا یہ تاریخی وکٹ اہم ثابت ہوا جس کے بعد  ہندوستان نے سیریز کا آخری میچ۱۵؍ رن سے جیت لیا۔

بیٹنگ کرتے ہوئے  ہندوستان نے مقررہ ۲۰؍ اوورز میں۷؍ وکٹوں کے نقصان  پر ۱۷۵؍ رن بنائے۔ کپتان ہرمن پریت کور نے شاندار قیادت کا مظاہرہ کرتے ہوئے۴۳؍ گیندوں پر۶۸؍رن کی دلکش اننگز کھیلی جس میں ۹؍ چوکے اور ایک چھکا شامل تھا۔

سیریز جیتنے کے بعد ہرمن پریت کور نے کہا کہ ٹیم کی مسلسل محنت کا صلہ اب مل رہا ہے۔ انہوں نے کہا کہ۲۰۲۵ء ہمارے لئے شاندار سال رہا ۔ اس سال کی گئی تمام محنت کا ہمیں کریڈٹ ملا ہے۔ اصل بات ان اچھی عادتوں کو برقرار رکھنا ہے۔انہوں نے مزید کہا’’ون ڈے سے ٹی ٹوینٹی میں منتقلی آسان نہیں تھی، مگر سبھی کھلاڑی پُرجوش تھیں ۔ ہم نے اس کیلئے جدوجہد کی اور خوشی ہے کہ سب کچھ بہتر انداز میں سامنے آیا۔آئندہ آئی سی سی ویمنز ٹی ٹوینٹی ورلڈ کپ۲۰۲۶ء(انگلینڈ اور ویلز) کو مد نظر رکھتے ہوئے کپتان نے رفتار برقرار رکھنے پر زور دیا۔ انہوں نے کہا’’اگلے ۶؍ ماہ بہت اہم ہیں۔ ہم مزید محنت  اور معیار کو بلند کرنا چاہتے ہیں۔‘‘آئندہ سال ٹی ۲۰؍ عالمی کپ جون میں کھیلا جائے گا۔