دنیا کے قدیم ترین اور بین الاقوامی سطح پر معروف ایڈونچر کھیلوں کے مقابلوں میں شمار ہونے والی اس ریس کا کامیاب اختتام دارجلنگ ہمالیہ میں ہوا۔

برطانیہ کے ڈنکن کروٹینڈن اور امریکہ کی اینی ولیمز نے ہمالیائی ۱۰۰؍ میل اسٹیج ریس کے بالترتیب مردوں اور خواتین کے زمرے کے خطاب جیت لئے۔ ۲۹؍ اکتوبر سے۲؍ نومبر تک منعقدہ اس مقابلے  کے ۳۵؍ویں ایڈیشن میں امریکہ، برطانیہ، چلی، میکسیکو، یوکرین اور ہندوستان سمیت کئی ممالک کے طویل فاصلے کے دوڑنے والوں نے حصہ لیا۔ دنیا کے قدیم ترین اور بین الاقوامی سطح پر معروف ایڈونچر کھیلوں کے مقابلوں میں شمار ہونے والی اس ریس کا کامیابی کے ساتھ اختتام دارجلنگ ہمالیہ میں ہوا۔

ماؤنٹ ایورسٹ اور کنچن جنگا کے شاندار پہاڑی سلسلوں کے سائے میں منعقدہ اس ریس کا راستہ دارجلنگ ہمالیہ کے خوبصورت پہاڑی مناظر، مشہور چائے کے باغات، گھنے جنگلات، دور دراز دیہات اور دشوار گزار ہمالیائی علاقوں سے گزرا۔ شرکا کو جسمانی چیلنج کے ساتھ قدرتی حسن اور مقامی ثقافت سے بھی روشناس ہونے کا موقع ملا۔ یہ مقابلہ برسوں سے دنیا کی خوبصورت اور مشکل ترین اسٹیج ریسوں میں شمار ہوتا ہے۔

یہ بھی پڑھئے:ہندوستان نے نیوزی لینڈ کو پانچ وکٹ سے ہرا کر سیریز میں برتری حاصل کرلی

ہمالین۱۰۰؍ میل اسٹیج ریس کے مردوں کے زمرے میں برطانیہ کے ڈنکن کروٹینڈن نے ۲۴؍ گھنٹے۴۴؍ منٹ میں فاصلہ طے کرکے پہلی پوزیشن حاصل کی ۔ چلی کے جولیو ڈوسال۲۸؍ گھنٹے۴۴؍منٹ کے ساتھ دوسرے اور ہندوستان کے کرنل مندیپ مان۲۹؍ گھنٹے۱۰؍ منٹ کے ساتھ تیسرے مقام پر رہے ۔خواتین کے زمرے میں امریکہ کی اینی ولیمز نے ۳۲؍ گھنٹے۲۰؍منٹ میں ریس جیت لی۔ ہندوستان کی شردھا کلکرنی۳۲؍ گھنٹے۵۰؍ منٹ کے ساتھ دوسرے اور برطانیہ کی اسنوڈ فیمفورٹ۳۴؍ گھنٹے ۵۸؍ منٹ کے ساتھ تیسرے مقام پر رہیں۔ ہمالین ۱۰۰؍ کلومیٹر اسٹیج ریس کے مردوں کے زمرے میں ہندوستان کے رمن جیت اوبیرائے نے۱۷؍ گھنٹے۳۳؍منٹ میں فاصلہ طے کرکے پہلا مقام حاصل کیا۔ چلی کے کرسٹیان سیویوکنگ ۱۸؍ گھنٹے۴۰؍ منٹ کے ساتھ دوسرے اور تھمیا اڈوپا۱۸؍ گھنٹے۵۹؍ منٹ کے ساتھ تیسرے مقام پر رہے۔خواتین  کے ۱۰۰؍ کلومیٹر زمرے میں میکسیکو کی ناہیلا ہرنانڈیز نے ۱۴؍ گھنٹے۴۸؍ منٹ کے وقت کے ساتھ پہلی پوزیشن حاصل کی۔ ریس کے بانی اور ڈائریکٹر چندر شیکھر پانڈے نے کہا کہ ہمالین۱۰۰؍ میل اسٹیج ریس کا مقصد محض کھیلوں کا مقابلہ منعقد کرنا نہیں بلکہ  ہمالیہ کے قدرتی اور ثقافتی ورثے کو عالمی برادری تک پہنچانا، ایڈونچر سیاحت کو فروغ دینا اور لوگوں میں فطرت و ماحولیات کے تئیں حساسیت پیدا کرنا بھی ہے۔