مانچسٹر سٹی فٹبال کلب نے جدوجہد کے بعد وولور ہیمپٹن فٹبال کلب کو ۰۔ ۱؍ گول سے مات دی۔

ڈی بروئن مانچسٹر سٹی فٹبال کلب کو تیسرے نمبر پر لے گئے۔ کیون ڈی بروئن کے گول نے مانچسٹر سٹی کو جمعہ کی دیر رات وولور ہیمپٹن وانڈررس کے خلاف۰۔ ۱؍گول سے اہم کامیابی سے ہمکنار کر دیا۔ یہ جیت انہیں انگلش پریمیرلیگ (ای پی ایل) فٹبال میں تیسرے نمبر پر لے گئی۔ بلجیم سے تعلق رکھنے والے ڈی بروئن سیزن کے اختتام پر مانچسٹر سٹی چھوڑ دیں گے لیکن انہوں نے۳۵؍ویں منٹ میں اس ٹیم کے خلاف گول کر کے ثابت کر دیا جس نے اپنے آخری ۶؍ لیگ میچ جیتے تھے۔ اس جیت کے ساتھ ہی مانچسٹر سٹی ٹیم ۳۵؍ میچوں میں ۶۴؍ پوائنٹس کے ساتھ تیسری پوزیشن پر پہنچ گئی ہے اور چمپئن لیگ میں جگہ کی دعویدار بن گئی ہے۔ مانچسٹر سٹی اب دوسرے نمبر پر موجود آرسنل سے ۳؍ پوائنٹ پیچھے ہے جس کے۳۴؍ میچوں میں ۶۷؍ پوائنٹس ہیں۔ لیورپول پہلے ہی ٹائٹل اپنے نام کر چکا ہے۔