موجودہ ورلڈ چمپئن ہندوستان کی خاتون ٹیم کو آسٹریلیا کے خلاف جاری ۳؍ میچوں کی ون ڈے سیریز میں اپنی امیدیں برقرار رکھنے کے لئے جمعہ کو یہاں ہونے والے دوسرے خواتین یک روزہ میچ میں بلے بازی کے شعبے میں غیر معمولی بہتری دکھانی ہوگی۔

موجودہ ورلڈ چمپئن ہندوستان کی خاتون ٹیم کو آسٹریلیا کے خلاف جاری ۳؍ میچوں کی ون ڈے سیریز میں اپنی امیدیں برقرار رکھنے کے لئے جمعہ کو یہاں ہونے والے دوسرے خواتین یک روزہ میچ میں بلے بازی کے شعبے میں غیر معمولی بہتری دکھانی ہوگی۔ پہلے میچ میں شکست کے بعد سیریز میں بنے رہنے کے لئے ہندوستانی ٹیم کے پاس اب غلطی کی کوئی گنجائش نہیں ہے۔ ٹی۔ ۲۰؍ سیریز دو ایک سے جیتنے کے بعد ہندوستانی ٹیم ون ڈے فارمیٹ میں اس تسلسل کو برقرار نہ رکھ سکی اور برسبین میں کھیلے گئے پہلے میچ میں اسے ۶؍ وکٹوں سے شکست کا سامنا کرنا پڑا۔ ریکارڈز بتاتے ہیں کہ ہندوستان کی خواتین ٹیم نے آسٹریلیا کے خلاف آج تک کوئی دو طرفہ ون ڈے سیریز نہیں جیتی ہے۔ اب تک دونوں ممالک کے درمیان ۱۱؍ون ڈے سیریز کھیلی گئی ہیں اور تمام کی تمام آسٹریلیا کے نام رہی ہیں۔ تاہم، ہندوستانی ٹیم ۲۰۲۵ء کے ون ڈے ورلڈ کپ سیمی فائنل میں آسٹریلیا کے خلاف اپنی ۵؍وکٹوں کی تاریخی جیت سے حوصلہ پانے کی کوشش کرے گی۔ اگر ہندوستان کی خاتون ٹیم کو آسٹریلیا کیخلاف کامیابی حاصل کرنی ہے تو اسے آل راؤنڈ کھیل پیش کرنا ہوگا۔