ہرمن پریت سنگھ کے۲؍گول کے باوجود سنسنی خیز مقابلے میں ٹیم انڈیا کو ۳۔۴؍سے شکست ہوئی۔

ہندوستانی ہاکی ٹیم کو ایف آئی ایچ ہاکی پرو لیگ ۲۵۔ ۲۰۲۴ء کے میچ میں ارجنٹائنا کے خلاف شاندار کھیل کے باوجود شکست کا سامنا کرنا پڑا۔ یہاں نیدرلینڈ کے ایمسٹیل وین کے ویگنر ہاکی اسٹیڈیم میں کھیلے گئے میچ میں ارجنٹائنا نے ہندوستان کو ۳۔ ۴؍ سے شکست دی۔ 
 ہندوستان کی جانب سے ہرمن پریت سنگھ نے (۱۲؍ویں، ۳۳؍ویں منٹ) میں ۲؍ گول کئے جبکہ ابھیشیک نے (۴۲؍ویں منٹ) میں تیسرا گول کیا۔ ارجنٹائنا کے لئے پہلا گول میٹیاس رے نے تیسرے منٹ میں، اس کے بعد لوکاس مارٹینیز نے ۱۷؍ویں منٹ میں، سینٹیاگو تارازونا نے ۳۴؍ویں منٹ میں اور لوسیو مینڈیز نے ۴۶؍ ویں منٹ میں گول کئے۔ 
  ارجنٹائنا نے میچ کا آغاز جارحانہ انداز میں کیا اور تیسرے منٹ میں ہی میٹیاس نے فیلڈ گول کر کے اپنی ٹیم کو ایک صفر سے برتری دلائی۔ ہندوستان نے جلد ہی واپسی کی اور۱۲؍ویں منٹ میں پنالٹی کارنر حاصل کیا، جسے کپتان ہرمن پریت سنگھ نے شاندار انداز میں گول میں تبدیل کر کے اسکور ایک ایک کر دیا۔ پہلا کوارٹر ایک ایک کی برابری پر ختم ہوا۔ 
 دوسرے کوارٹر کے آغاز میں ہی ارجنٹائنا نے ۱۷؍ویں منٹ میں لوکاس مارٹینیز کے گول کی بدولت دو ایک کی برتری حاصل کر لی۔ تیسرے کوارٹر میں ہندوستان نے جارحانہ آغاز کیا اور ارجنٹائنا کے دفاعی لائن کو توڑتے ہوئے پنالٹی اسٹروک حاصل کیا، جسے ہرمن پریت سنگھ نے ۳۳؍ویں منٹ میں گول میں تبدیل کر کے میچ ۲۔ ۲؍سے برابر کر دیا۔ اگلے ہی منٹ میں سینٹیاگو تارازونا نے پنالٹی کارنر کے ذریعے گول کر کے اسکور ارجنٹائنا کے حق میں ۲۔ ۳؍کر دیا۔ 
 ۴۲؍ویں منٹ میں ہندوستان کے ابھیشیک نے شاندار فیلڈ گول کر کے میچ کو دوبارہ برابر کر دیا لیکن ۴۶؍ویں منٹ میں ارجنٹائنا نے چوتھے کوارٹر کے آغاز کے محض ۱۸؍سیکنڈ بعد لوسیو مینڈیز کے گول سے پھر برتری حاصل کر لی۔ اس کے بعد ارجنٹائنا نے دفاع اور حملے میں عمدہ کارکردگی دکھاتے ہوئے ہندوستان کو ۳۔ ۴؍ سے شکست دے دی۔