اگر آپ کو لگتا تھا کہ گووندا کا فلمی کریئر ختم ہو چکا ہے تو ایسا نہیں ہے۔ گزشتہ چند برسوں میں اداکار زیادہ تر تنازعات یا ان کی اہلیہ سنیتا آہوجا کے بیانات کی وجہ سے خبروں میں رہے۔

اگر آپ کو لگتا تھا کہ گووندا کا فلمی کریئر ختم ہو چکا ہے تو ایسا نہیں ہے۔ گزشتہ چند برسوں میں اداکار زیادہ تر تنازعات یا ان کی اہلیہ  سنیتا آہوجا  کے بیانات کی وجہ سے خبروں میں رہے۔ تاہم اب گووندا نے فلمی دنیا میں بھرپور واپسی کا اعلان کر دیا ہے اور ان کی نئی فلم ’’روپا‘‘ پر کام شروع ہو چکا ہے۔
گووندا دوبارہ فلموں میں نظر آئیں گے
ایک پریس کانفرنس کے دوران گووندا نے اعلان کیا کہ وہ نہ صرف نئی اداکارہ رانی سورنکر  کے ساتھ اس فلم میں مرکزی کردار ادا کریں گے بلکہ اس فلم کے پروڈیوسر بھی ہوں گے۔گووندا نے کہاکہ ’’شاید یہی میری قسمت تھی کہ مجھے کئی بار ’ختم شدہ‘ قرار دیا گیا۔ لوگ کہتے رہے کہ اب میں فلموں میں نظر نہیں آؤں گا، لیکن میں ہر بار دوبارہ آغاز کرتا رہا۔ میں خدا سے دعا کرتا ہوں کہ یہ فلم میری سوچ کے مطابق کامیاب ہو، ایسی کامیابی حاصل کرے جس کا شاید لوگ تصور بھی نہ کر سکیں، اور اپنا جادو دکھائے۔
انہوں نے مزید کہا ’’یہ فلم خاص طور پر نوجوانوں کے لیے بنائی جا رہی ہے۔ میری خواہش ہے کہ جب وہ اسے سنیما گھروں میں دیکھیں تو انہیں اپنے خوابوں پر یقین کرنے اور انہیں حقیقت میں بدلنے کی ترغیب ملے۔ اس سے آگے میں روحانیت کے بارے میں کچھ نہیں کہنا چاہتا۔

یہ بھی پڑھئے:’’اوینجرز: ڈومز ڈے‘‘کے ٹکٹ ریلیز سے پانچ ماہ پہلے فروخت ہوں گے

نمبر ۱۴؍ میری زندگی کا خوش قسمت نمبر ہے
گووندا نے اپنی گفتگو میں علمِ اعداد (Numerology) پر اپنے یقین کا بھی ذکر کیا۔ انہوں نے کہا’’نمبر ۱۴؍ ہمیشہ میرے لیے خوش قسمت رہا ہے۔ میں علمِ اعداد پر یقین رکھتا ہوں، حتیٰ کہ میرے نام کا تعلق بھی اسی سے ہے۔ میں نے صرف ۱۴؍سال کی عمر میں اس پر یقین کرنا شروع کیا تھا۔ خدا کے فضل سے ایک ہی ہفتے میں میں نے ۱۴؍فلمیں سائن کیں، اور اس کے بعد مجھے۱۴؍ سال تک سپر اسٹارڈم ملا۔ بعد میں میں ۱۴؍ویں لوک سبھا کا رکنِ پارلیمان بھی بنا۔ اس کے بعد مجھے ۱۴؍ سال کی جدوجہد سے گزرنا پڑا، پھر میں دوبارہ فلموں میں واپس آ رہا ہوں۔ اس بار میں مزید پانچ سال انتظار نہیں کرنا چاہتا تھا۔ میں نے خود سے کہا کہ اب دوبارہ آغاز کرنا ہے، اور مجھے امید ہے کہ یہ میری نئی فلمی زندگی کا آغاز ثابت ہوگا۔

یہ بھی پڑھئے:ورلڈ کپ سیمی فائنل میں لیونل میسی اور ہیری کین آمنے سامنے

نوجوان ناظرین کو مدنظر رکھتے ہوئے نئی شروعات
گووندا خود کو روحانی شخصیت مانتے ہیں، لیکن اس بار انہوں نے انتظار کرنے کے بجائے اپنی پرانی روش بدلنے کا فیصلہ کیا ہے۔ ان کا کہنا ہے کہ وہ اپنی نئی فلم کو خاص طور پر نوجوان نسل کے لیے زیادہ پرکشش بنانا چاہتے ہیں۔گووندا آخری بار۲۰۱۹ء میں ریلیز ہونے والی فلم ’’رنگیلا راجا‘‘ میں نظر آئے تھے، جس میں انہوں نے دُہرا کردارادا کیا تھا۔حال ہی میں وہ ریئلیٹی شو ’’لاک اَپ سیزن ۲‘‘ میں بھی مختصر طور پر دکھائی دیے، جہاں وہ اپنی اہلیہ  سنیتا آہوجا  کی حمایت کے لیے پہنچے تھے۔