پیرس کے رولان گیروس اسٹیڈیم میں ۲۵؍ مئی ۲۰۲۵ءکو فرنچ اوپن کے آغاز سے قبل ٹینس کے عظیم کھلاڑی رافیل نڈال کو ایک جذباتی تقریب میں خراجِ تحسین پیش کیا گیا۔ اس تقریب میں راجر فیڈرر، نوواک جوکووچ اور اینڈی مرے بھی موجود تھے۔

پیرس کے رولان گیروس اسٹیڈیم میں ۲۵؍ مئی ۲۰۲۵ءکو فرنچ اوپن کے آغاز سے قبل ٹینس کے عظیم کھلاڑی رافیل نڈال کو ایک جذباتی تقریب میں خراجِ تحسین پیش کیا گیا۔ ’’کنگ آف کلی‘‘ کے لقب سے مشہور نڈال نے اس گرینڈ سلیم میں ریکارڈ۱۴؍ مرتبہ کامیابی حاصل کی اور ان کی خدمات کو سراہنے کیلئے کورٹ فلپ شاتریئر پر ایک خصوصی تقریب منعقد کی گئی۔ تقریب میں ۱۵؍ ہزار سے زائد شائقین نے ’’Merci Rafa‘‘ کے سرخ ٹی شرٹس پہن کر شرکت کی جبکہ نڈال کے دیرینہ حریف اور دوست راجر فیڈرر، نوواک جوکووچ اور اینڈی مرے بھی موجود تھے۔ اس موقع پر نڈال کی زندگی اور کریئر پر مبنی ایک چار منٹ کی ویڈیو دکھائی گئی جس میں ان کی۲۰۰۵ء کی پہلی فتح سے لے کر ۲۰۲۲ءکی آخری کامیابی تک کے لمحات کو سمیٹا گیا۔ نڈال نے اپنے خطاب میں فرانس، شائقین اور خاص طور پر اپنے چچا اور کوچ ٹونی نڈال کا شکریہ ادا کیا جنہوں نے ان کی تربیت میں اہم کردار ادا کیا۔ 

🥹🧡#RolandGarros pic.twitter.com/8HNClLCUe7

— Roland-Garros (@rolandgarros) May 25, 2025

تقریب کے اختتام پر نڈال کے اعزاز میں کورٹ پر ایک یادگاری تختی نصب کی گئی جس میں ان کے جوتے کا نشان، دستخط اور فرنچ اوپن ٹرافی کی تصویر شامل تھی۔ یہ تختی کورٹ کے نیٹ کے قریب زمین میں نصب کی گئی جو ان کی۱۴؍ فتوحات کی دائمی یادگار بن گئی۔ نڈال نے اپنی تقریر میں کہا: ’’یہاں میں نے خوشی، غم، جیت اور ہار سب کچھ محسوس کیا۔ یہ کورٹ میری زندگی کا اہم حصہ رہا ہے اور میں اس محبت اور احترام کیلئے شکر گزار ہوں جو مجھے یہاں ملا۔ ‘‘انہوں نے مزید کہا کہ وہ مستقبل میں کسی نمائشی میچ کے ذریعے کورٹ پر واپسی کا ارادہ رکھتے ہیں لیکن فی الحال وہ اپنی اکیڈمی اور کاروباری مصروفیات پر توجہ مرکوز کئے ہوئے ہیں۔ تقریب کے اختتام پر نڈال نے اپنے بیٹے کو گود میں اٹھا کر شائقین کو الوداع کہا، جو اس لمحے کو مزید جذباتی بنا گیا۔ یہ تقریب نہ صرف نڈال کی شاندارکریئر کا اعتراف تھی بلکہ ٹینس کی دنیا میں ان کی لازوال خدمات کا جشن بھی۔