ہندوستان کی اسٹار اسکواش کھلاڑی اناہت سنگھ نے ورلڈ جونیئر اسکواش چمپئن شپ کے فائنل میں جگہ بنا کر ایک بڑی کامیابی حاصل کی ہے۔ وہ سال ۲۰۰۵ء میں تجربہ کار کھلاڑی جوشنا چنپا کے بعد اس باوقار ٹورنامنٹ کے فائنل میں پہنچنے والی پہلی ہندوستانی بن گئی ہیں۔ اب اناہت ہندوستان کی پہلی ورلڈ جونیئر اسکواش چمپئن بننے سے صرف ایک جیت دور ہیں۔

 

 

ٹاپ سیڈ دہلی کی اناہت نے سیمی فائنل میں مصر کی چوتھی سیڈ بارب سامح کو۳۔۱۱،۱۱۔۸،۴ ۔۱۱،۶۔۱۱؍ سے شکست دے کر فائنل میں جگہ پکی کی۔ عالمی رینکنگ میں ۲۰؍ویں نمبر پر فائز اناہت نے پچھلے سال کانسہ کا تمغہ جیتا تھا اور اس بار خطاب کی مضبوط دعویدار کہی جا رہی ہیں۔

جیت کے بعد اناہت سنگھ نے کہا’’ میں بہت خوش ہوں۔ کچھ مہینے پہلے برٹش جونیئر اوپن میں بھی بارب کے خلاف میرا مقابلہ ہوا تھا اور وہ بھی کافی قریبی رہا تھا۔ اس لئے مجھے معلوم تھا کہ آج مجھے اپنا بہترین کھیل پیش کرنا ہوگا۔‘‘انہوں نے مزید کہا’’پچھلے میچ میں میں اپنا بہترین کھیل نہیں دکھا سکی تھی، اس لئے آج میں نے خود کو ثابت کرنے کی کوشش کی۔ میں نے ۴؍ بار ورلڈ جونیئر چمپئنشپ کھیلی ہے اور پہلے کوارٹر فائنل اور سیمی فائنل میں ہار چکی ہوں۔ فائنل میں پہنچنے پر میرے والدین اور کوچ بہت خوش ہیں، لیکن ٹورنامنٹ ابھی ختم نہیں ہوا ہے۔‘‘

 

 

فائنل میں اناہت کا مقابلہ مصر کی دوسری سیڈ رقیہ سالم سے ہوگا۔ اگر وہ یہ میچ جیتنے میں کامیاب رہتی ہیں تو ورلڈ جونیئر اسکواش چمپئن بننے والی پہلی ہندوستانی کھلاڑی بن جائیں گی۔ ہندوستانی اسکواش کیلئے یہ ایک تاریخی کامیابی ہوگی اور اناہت کے شاندار کریئر میں ایک نیا باب جوڑ دے گی۔