سپر۴؍ کے میچ میں سری لنکا کو ۴۱؍رن سے شکست دے دی۔ روہت شرما نے اچھی بلے بازی کی اور نصف سنچری بنائی

عمدہ گیند بازی اور فیلڈنگ کی بدولت ہندوستان نے منگل کو میزبان سری لنکا کو کم اسکور والے میچ میں۴۱؍؍ رن سے شکست دے کر ایشیا کپ۲۰۲۳ء کے فائنل میں فاتحانہ داخلہ حاصل کر لیا۔ ہندوستان نے پہلے بلے بازی کرتے ہوئے ۴۹ء۱؍ اوور میں۲۱۳؍ رن بنائے جس کے جواب میں سری لنکا کی پوری ٹیم۴۱ء۳؍ اوور میں۱۷۲؍رن بنا کر پویلین لوٹ گئی۔ ہندوستان کی جیت میں گیند بازوں کے ساتھ ساتھ فیلڈنگ کا بھی اہم کردار رہا۔ 
پاکستان کے خلاف ۵؍ وکٹ لینے والے کلدیپ یادو نے سری لنکا کے خلاف بھی شاندار گیندبازی  کا مظاہرہ کیا اور۴۳؍ رن دے کر ۴؍ وکٹ حاصل کئے، جب کہ  بیٹنگ میں ناکام رہنے والے رویندر جڈیجا نے کپتان داسن شناکا (۹) اور دھننجے ڈی سلوا (۴۱) کے وکٹ  لینے کے بعد ڈونتھ ویلالگے (۴۱) کے ساتھ بڑھنے والی اس خطرناک شراکت کو توڑ دیا جو بالآخر ہندوستان کی جیت کا سبب بنی۔ ہاردک پانڈیا نے درمیانی اوور میں اپنا کردار بخوبی نبھایا۔ انہوں نے محتاط بولنگ کی اور مہیش تھیکشنا (۲) کا وکٹ لیا۔ اس سے قبل جسپریت بمراہ نے پتھم نسانکا (۶) اور کوشل مینڈس (۱۵) کے وکٹ لے کر ہندوستان کی امیدوں کو پر لگا دیا، دیموتھ کرونارتنے (۲) کو محمد سراج نے شبھمن گل کے ہاتھوں کیچ آؤٹ کیا۔
ہندوستان کی جیت کے باوجود سری لنکا کے آل راؤنڈر ڈونتھ ویلالگے پورے میچ میں توجہ کا مرکز بنے رہے۔ ۲۰؍ سالہ نوجوان ویلالگے نے ۵؍ اہم وکٹ لے کر نہ صرف ہندوستان کی اننگز کو کم اسکور تک محدود کرنے میں اہم کردار ادا کیا بلکہ بعد میں بلے بازی کا بھی شاندار مظاہرہ کیا اور شاندار ۴۲؍ رن بنائے۔ انہیں میچ کا بہترین کھلاڑی قرار دیا گیا۔ اس سے قبل ڈنتھ ویلالگے (۴۰؍ رن پر ۵؍ وکٹ) اور چرتھ اسالنکا (۱۸؍رن پر ۴؍ وکٹ) کی مہلک اسپن باؤلنگ کے درمیان کپتان روہت شرما (۵۳؍ رن)، ایشان کشن (۳۳؍رن) اور کے ایل راہل (۳۹؍رن) کی کارآمد اننگز کی مدد سے ہندوستان نے ۴۹ء۱؍اوور میں۲۱۳؍ رن بنائے۔