کلدیپ یادو نے۵؍،آر اشون نے ۴؍جبکہ جڈیجہ نے انگلینڈ کے ایک بلے باز کو آؤٹ کیا،مہمان ٹیم ۲۱۸؍رنوں پر ڈھیر، میزبان ٹیم نے ایک وکٹ پر ۱۳۵؍رن بنالئے۔

پانچویں اور آخری ٹیسٹ میچ کے پہلے دن دھرم شالہ کے ایچ پی سی اے اسٹیڈیم میں کلدیپ یادو، روی چندرن اشون اور رویندرجڈیجہ نے اسپن گیندبازی کا شاندار مظاہرہ کرتے ہوئے انگریز بلے بازوں کو اسپن کے جال میں پھانس لیا۔ انگلینڈ کی پوری ٹیم پہلے ہی روزمحض ۲۱۸؍رنوں پر ڈھیر ہوگئی۔ کلدیپ (۷۲؍پر۵) نے چوتھی بار ۵؍ یا اس سے زیادہ وکٹیں لے کر انگلینڈ کے ٹاپ اور مڈل آرڈر کو تباہ کر دیا جبکہ اشون (۵۱؍پر ۴) نے اپنا ۱۰۰؍واں میچ کھیلتے ہوئے لوور آرڈر کو تباہ کر دیا۔ جڈیجہ نے بھی ایک وکٹ حاصل کیا جس کی وجہ سے تمام ۱۰؍ وکٹیں اسپنروں کے حصے میں آئیں۔ پہلے دن کا کھیل ختم ہونے تک ہندوستان نے انگلینڈ کے ۲۱۸؍رنوں کے جواب میں ایک وکٹ پر۱۳۵؍ رن بنا لئے تھے۔ کپتان روہت شرما ۵۲؍ اور شبھمن گل ۲۶؍رن بناکر کریز پر موجود ہیں۔ اس سیریز میں لگاتار ۲؍ ڈبل سنچریاں بنانے والے یشسوی جیسوال نے ۵۷؍ رنوں کی نصف سنچری اننگز کھیلی۔ اپنی اننگز میں ۳۳؍واں رن لینے کے ساتھ ہی یشسوی نے ٹیسٹ کرکٹ میں اپنے ایک ہزاررن بھی مکمل کر لئے۔ جیسوال نے ۵۸؍ گیندوں میں ۵۷؍رن بنائے اور پہلے وکٹ کیلئے کپتان کے ساتھ ۱۰۴؍رن جوڑے۔ 
 کلدیپ کی جادوئی گیندبازی
پہلا دن چائنا مین بولر کلدیپ کے نام رہا۔ ۵؍ وکٹیں لینے والے اس گیندباز نے جیک کراؤلی کا شکار کرنے کیلئے ایسی گیند پھینکی کہ انگلش بلے باز بھی کچھ نہ کر سکے اور ان کی وکٹیں گر گئیں۔ کلدیپ بو لنگ کرنے سے پہلے، کراؤلی(۷۹) آسانی سے رن بنا رہے تھے اور اپنی سنچری کی طرف بڑھ رہے تھے۔ انگلینڈ کی اننگز کا ۳۷؍واں اوور کرنے آئے کلدیپ نے دوسری گیند ۱۰؍ ڈگری سے زیادہ گھمائی اور گیند بلے اور پیڈ کے درمیان سےسیدھی سٹمپ پر چلی گئی۔ 
وکٹوں کی نصف سنچری
کلدیپ، جنہوں نے ۲۰۱۷ءمیں دھرم شالہ میں اپنے ٹیسٹ کریئر کا آغاز کیا تھا، اس گراؤنڈ پر ایک خاص مقام حاصل کیا ہے۔ کلدیپ نے اپنے ٹیسٹ کریئر میں ۵۰؍ وکٹیں مکمل کیں۔ ہندوستان اور انگلینڈ کے درمیان کھیلے جا رہے پانچویں ٹیسٹ میچ میں اس چائنا مین بولر نے وہ کر دکھایا جو ۱۰۰؍سال میں نہیں ہوا۔ دراصل کلدیپ پچھلے ۱۰۰؍برسوں میں سب سے کم گیندیں پھینک کر۵۰؍وکٹ لینے کے معاملے میں پہلے نمبر پر ہیں۔ وہ ہندوستانی گیند بازوں کی فہرست میں سب سے اونچے مقام پر پہنچ گئے۔ کلدیپ نے ۱۸۷۱؍گیندیں پھینک کر ۵۰؍ وکٹیں مکمل کی ہیں۔ ان کا اب تک کا کریئر شاندار رہا ہے۔ جیسے ہی انگلینڈ کا آخری وکٹ گرا، کلدیپ نے ۵۷ء۴؍ اوور کی پرانی سرخ گیند کو اشون کی طرف پھینک دیا لیکن اشون نے اسے فوراً کلدیپ کو واپس کر دیا۔ یاد رہے کہ اشون نے اپنے ۱۰۰؍ ویں ٹیسٹ میں ۴؍ وکٹ لئے لیکن کلدیپ نے ان سے بہتر کارکردگی کا مظاہرہ کیا۔ 
اشون کا ۱۰۰؍واں ٹیسٹ
میچ شروع ہونے سے پہلے آراشون کو ان کے ۱۰۰؍ ویں میچ کیلئے کیپ پیش کرتے ہوئے اعزاز سے نوازا گیا۔ اس موقع پر ان کی اہلیہ اور بچے بھی ان کے ساتھ تھے۔ 
 پیڈیکل کا ڈیبیو
 اس سیریز میں ہندوستانی ٹیم مینجمنٹ نے ایک اور نوجوان کو ٹیسٹ ڈیبیو کرنے کا موقع دیا۔ پڈیکل رجت پاٹیدار، سرفراز خان، دھرو چند جریل، آکاش دیپ کے بعد اس سیریز میں ڈیبیو کرنے والے پانچویں کھلاڑی ہیں۔ اپنا ۱۰۰؍ واں ٹیسٹ کھیلنے والے روی چندرن اشون نے ڈیبیو کیپ پڈیکل کو سونپی۔