فائنل میں ہندوستانی خواتین ٹیم نے سری لنکا کو۹۷؍ رن سے شکست دےدی۔ اسمرتی مندھانا نے ۱۱۶؍رن کی اننگز کھیلی۔

اسمرتی مندھانا کی (۱۱۶؍ رن)سنچری، ہرلین دیول (۴۷؍رن)، جمائمہ روڈریگیز (۴۴؍رن) اور کپتان ہرمن پریت کور (۴۱؍رن) کی شاندار بلےبازی کے بعد اسنیہ رانا (۴؍ وکٹ) اور امنجوت کور (۳؍ وکٹ) کی بدولت ہندوستانی ٹیم نے اتوار کو فائنل میں سری لنکا کو۹۷؍ رن سے ہراکر سہ فریقی یکروزہ سیریز جیت لی۔ 
۳۴۳؍رن کے ہدف کے تعاقب میں سری لنکا کی شروعات خراب رہی کیونکہ اس نے اپنا پہلا وکٹ ہسینی پریرا (صفر) کی گنوا دیا۔ پریرا کو امنجوت کور نے بولڈ آؤٹ کیا۔ اس کے بعد کپتان چماری اٹا پٹو بلے بازی کیلئے آئیں اور وشمی گنارتنے کے ساتھ مل کر اننگز کو سنبھالنے کی کوشش کی۔ دونوں بلے بازوں کے درمیان دوسرے وکٹ کیلئے ۶۸؍ رن کی شراکت ہوئی۔ امنجوت کور نے۱۴؍ویں اوور میں وشمی گنارتنے (۳۶؍رن) کو بولڈ کرکے شراکت کا خاتمہ کیا۔ اس کے بعد نیلاکشی ڈی سلوا اور اٹاپٹو نے تیسرے وکٹ کیلئے ۷۳؍رن جوڑے۔ ۲۴؍ویں اوور میں اسنیہ رانا نے چماری اٹاپٹو (۵۱؍رن) کو آؤٹ کیا۔ ہرشیتا سماراویکرما (۲۶؍رن) اور دیومی وہنگا (۴) آؤٹ ہوئے۔ ۳۳؍ویں اوور میں اسنیہ رانا نے نیلاکشی ڈی سلوا (۴۸؍رن) کو آؤٹ کر کے سری لنکا کو چھٹا وکٹ دلایا۔ اس کے بعد سری لنکا کا کوئی بھی بلے باز ہندوستانی گیندبازی حملہ کے خلاف زیادہ دیر تک پچ پر نہیں ٹھہر سکا۔ انوشکا سنجیوانی (۲۸؍ رن) اور ملکی مدارا (صفر) آؤٹ ہوئے۔ سوگندھیکا کماری ۲۷؍رن اور پیومی وتسلا ۹؍رن آؤٹ ہوئیں۔ ہندوستانی گیند بازوں نے سری لنکا کی پوری ٹیم کو۴۸ء۲؍ اوورس میں ۲۴۵؍ رن پر ڈھیر کر دیا اور میچ۹۷؍ رن سے جیت لیا۔ اسمرتی مندھانا کو۱۱۶؍ رن کی سنچری بنانے پر `پلیئر آف دی میچ کا ایوارڈ دیا گیا۔ ٹورنامنٹ میں ۱۵؍ وکٹ لینے والی اسنیہ رانا کو `پلیئر آف دی سیریزکا ایوارڈ ملا۔ ہندوستان کی جانب سے اسنیہ رانا نے ۴؍ اور امنجوت کور نے ۳؍ وکٹ حاصل کئے۔ شری چرنی نے ایک بلے باز کو آؤٹ کیا۔ 
اس سے قبل اسمرتی مندھانا (۱۱۶؍رن)، ہرلین دیول (۴۷؍رن)، جیمائمہ روڈریگیز (۴۴؍ رن) اور کپتان ہرمن پریت کور (۴۱؍ رن) کی شاندار اننگز کی بدولت ہندوستانی خواتین نے اتوار کو یہاں سہ فریقی ون ڈے سیریز کے فائنل میں سری لنکا کو۳۴۳؍ رن کا ہدف دیا۔ 
اتوار کو ہندوستانی خاتون ٹیم نے ٹاس جیت کر پہلے بلے بازی کا فیصلہ کیا۔ بلے بازی کیلئے آتے ہوئے پرتیکا راول اور اسمرتی مندھانا کی اوپننگ جوڑی نے اچھی شروعات کی اور پہلے وکٹ کیلئے ۷۰؍ رن جوڑے۔ ہندوستان نے اپنا پہلا وکٹ ۱۵؍ویں اوور میں پرتیکا راول (۳۰) کی صورت میں گنوایا۔ انہیں انوکا رناویرا نے آؤٹ کیا۔ اس کے بعد ہرلین دیول بلے بازی کیلئے آئیں اور اسمرتی مندھانا کے ساتھ مل کر اننگز کو سنبھالا۔ دونوں بلے بازوں کے درمیان دوسرے وکٹ کیلئے۱۲۰؍ رن کی شراکت ہوئی۔ 
۳۳؍ویں اوور میں دیومی وہنگا نے اسمرتی مندھانا کو آؤٹ کر کے سری لنکا کو دوسری کامیابی دلائی۔ اسمرتی مندھانا نے۱۰۱؍ گیندوں پر ۱۵؍ چوکوں اور۲؍ چھکوں کی مدد سے سنچری (۱۱۶؍رن) اننگز کھیلی۔ اس کے بعد ۳۷؍ ویں اوور میں دیومی وہنگا نے ہرلین دیول (۴۷؍رن) کو، جو نصف سنچری کے قریب تھیں ، اپنی ہی گیند پر کیچ کرکے پویلین بھیج دیا۔ وہیں کپتان ہرمن پریت کور نے۳۰؍ گیندوں پر ۴؍ چوکوں اور ایک چھکے کی مدد سے۴۱؍ رن بنائے۔ انہیں سوگندھیکا کماری نے آؤٹ کیا۔ ہندوستان نے اپنا پانچواں وکٹ رچا گھوش (۸؍ رن) کی شکل میں گنوادیا۔ ۴۶؍ ویں اوور کی آخری گیند پر سوگندھیکا کماری نے ۲۹؍ گیندوں پر جیمائمہ روڈریگیز(۴۴؍رن) کو آؤٹ کر کے سری لنکا کو چھٹی کامیابی دلائی۔ امن جوت کور (۱۸؍رن)۱۲؍  گیندوں پر ۷؍ویں وکٹ کی شکل میں آؤٹ ہوئیں۔ ہندوستانی ٹیم نے مقررہ۵۰؍ اوورس میں ۷؍ وکٹ پر۳۴۲؍ رن کا بڑا اسکور بنایا۔ سری لنکا کی جانب سے سوگندھیکا کماری، ملکی مدارا اور دیومی وہنگا نے ۲۔ ۲؍ وکٹ حاصل کئے۔ انوکا رناویرا نے ایک بلے باز کو آؤٹ کیا۔