آئی پی ایل میں آج پنجاب کی ٹیم جیت کی متمنی۔ لکھنؤ بھی پلے آف کی دوڑ میں شامل رہنے کیلئے پُرامید۔

پلے آف کی دہلیز پر کھڑی پنجاب کنگز کے خلاف لکھنؤ سپر جائنٹس (ایل ایس جی) ہمالیہ کی دلکش وادیوں سے گھرے دھرمشالہ کے خوبصورت میدان میں اتوار کو اپنی بقا کی لڑائی لڑے گی۔ 
چنئی سپرکنگز (سی ایس کے) کے خلاف اپنے ۴؍ وکٹ کی جیت سے پرجوش، پنجاب فارم کے ساتھ مضبوطی سے اس مقابلے میں اترے گا۔ پنجاب کی جان اس کی دھماکہ خیز سلامی جوڑی پربھسمرن سنگھ اور پریانش آریہ میں ہے، جنہوں نے اس سیزن میں تقریباً۷۰۰؍ رن بنائے ہیں۔ 
کپتان شریاس ایّر کی قیادت میں، پنجاب کی ٹیم میں ایّر، نہال وڈھیرا، ششانک سنگھ اور کیپر جوش انگلس کی بیٹنگ کی گہرائی کو مضبوط بناتے ہیں جبکہ بولنگ کے محاذ پر، عرشدیپ سنگھ اور مارکو جانسن نے لگاتار ابتدائی دھچکے دیئے ہیں جبکہ درمیانی اوورس میں یزویندر چہل کی اچھی گیند بازی نے بولنگ اٹیک کو دھار عطا کی ہے۔ سی ایس کے کے خلاف ان کے ۴؍ وکٹ نے مقابلہ کو یکطرفہ بنا دیا تھا۔ آل راؤنڈر عظمت اللہ عمرزئی، ہرپریت برار اور سوریانش شیڈگے نے پنجاب کی ٹیم کو مزید مضبوط کیا۔ 
اس کے برعکس رشبھ پنت کی قیادت والی لکھنؤ کی ٹیم فارم اور دباؤ دونوں کے ساتھ جدوجہد کر رہی ہے، وہ اپنے آخری ۴؍ میچوں میں سے ۳؍ ہارنے کے بعد پوائنٹس ٹیبل پر چھٹے نمبر پر ہے۔ ممبئی انڈینس کے ہاتھوں ۵۴؍ رن کی شکست نے انہیں باہر ہونے کی دہلیز پر پہنچا دیا ہے۔ ان کی پلے آف کی امیدوں کو زندہ رکھنے کیلئے اتوار کا میچ مؤثر طریقے سے جیتنا ضروری ہے۔ لکھنؤ کی بیٹنگ میں ہم آہنگی کا فقدان ہے، ایڈن مارکرم اور مشیل مارش مستحکم آغاز فراہم کرنے کیلئے جدوجہد کر رہے ہیں۔ 
پنت کے خراب فارم کی تلافی نکولس پورن کی نمبر ۳؍ پر شاندار بلے بازی نے تلافی کردی ہے جب کہ ڈیوڈ ملر اور عبدالصمد اب بھی جدوجہد کررہے ہیں۔ لکھنؤ کی گیند بازی بھی اوسط رہی ہے۔ جہاں مینک یادو، پرنس یادو اور اویس خان نے اہم اوورس میں رن دیئے، وہیں لیگ اسپنر روی بشنوئی ان کا بھروسے مند ہتھیار ہیں۔ مارکرم اور دگویش سنگھ راٹھی بھی امید پر کھرا اترنے کیلئے جدوجہد کرتے ہوئے نظر آرہے ہیں۔ ہماچل پردیش کرکٹ اسوسی ایشن کے خوبصورت اسٹیڈیم میں شروعات میں تیز گیند بازوں کو مدد ملنے کی امید ہے، لیکن کھیل آگے بڑھنے کے ساتھ ہی یہاں کی پچ بلے بازوں کیلئے مددگار رہی ہے۔ پہلے بیٹنگ کرنے والی ٹیموں نے یہاں آخری ۶؍ میچوں میں سے ۵؍ جیتے ہیں، اس لئے ٹاس کھیل کا فیصلہ کرنے میں اہم ثابت ہو سکتا ہے۔ پنجاب نے اس سیزن کے شروع میں لکھنؤ کو ۸؍ وکٹ سےشکست دی تھی۔