آئی پی ایل میں آج پنجاب کنگز کا مقابلہ راجستھان رائلز سے۔ پنجاب کے سبھی کھلاڑی فارم میں ہیں اور وہ میچ جیتنا چاہیں گے۔

میزبان راجستھان رائلز کو ہرا کر پنجاب کنگز کا ہدف انڈین پریمیر لیگ (آئی پی ایل)۲۰۲۵ء پوائنٹس ٹیبل پر سرفہرست پہنچنا ہوگا۔ 
اتوار کی دوپہر سوائی مان سنگھ اسٹیڈیم میں ٹیم کا مقابلہ راجستھان رائلز سے ہوگا۔ راجستھان پہلے ہی پلے آف کی دوڑ سے باہر ہو چکا ہے۔ پنجاب کیلئے سیزن کا۵۹؍ واں میچ بہت اہم ہے۔ پنجاب نے اپنے پچھلے ۵؍ میچوں میں سے ۴؍ جیتے ہیں اور شریاس ایّر کی کپتانی میں صحیح وقت پر چوٹی پر پہنچ گیا ہے۔ راجستھان کے خلاف جیت سے پنجاب کنگز چوٹی پر پہنچ سکتا ہے، جس سے پلے آف کی دوڑ مزید سخت ہو جائے گی۔ 
اس کے برعکس، راجستھان رائلز پچھلے ۵؍ میچوں میں سے ۴؍ میں ہار کے بعد اس میچ میں اترے گی۔ ابتدائی توقعات پر پورا اترنے والی یہ فرنچائزی مواقع سے فائدہ اٹھانے میں ناکام رہی ہے اور چوٹ اور تسلسل سے جوجھ رہی ہے۔ چوٹ کی وجہ سے سنجو سیمسن کے باہر ہونے سے ٹیم کی قیادت پر بھی اثرپڑا ہے۔ 
پنجاب کی طاقت جارحانہ بلے بازی آرڈر اور متوازن بولنگ حملہ ہے۔ اوپنر پریانش آریہ اور پربھسمرن سنگھ شاندار فارم میں ہیں، آریہ نے پچھلے میچ میں صرف۳۴؍ گیندوں پر۷۰؍ رن بنائے۔ مڈل آرڈر میں، وکٹ کیپر-بلے باز جوش انگلس اور کپتان ایّر مضبوطی اور رفتار فراہم کرتے ہیں۔ آل راؤنڈر مارکس اسٹوئنس اور عظمت اللہ عمرزئی، اگر دستیاب ہوں تو لوئر مڈل آرڈر کو مزید مضبوط کرتے ہیں۔ 
گیندبازی کے شعبے میں عرشدیپ سنگھ پاور پلے اور ڈیتھ اوورس میں تیز گیند باز ہیں جبکہ مارکو جینسن اور عمرزئی سیم متبادل کے طور پر موجود ہیں۔ تجربہ کار لیگ اسپنر یزویندر چہل، جنہوں نے اس سیزن میں اہم وکٹ لئے ہیں، جے پور کی پچ پر ایک اہم خطرہ ہوں گے، جس نے درمیانی ٹرن اور دو رفتار کی باؤنس دکھائی ہے۔ 
میزبان ٹیم کیلئے نوجوان اوپنر ویبھو سوریاونشی نے گجرات ٹائٹنس کے خلاف سیزن کے آغاز میں دھماکہ خیز سنچری کے ساتھ خود کو منوایا اور ریان پراگ نے حال ہی میں کے کے آر سے ہارنے پر۹۵؍ رن کی اننگز کھیل کر اپنے دم پر مقابلہ کیا تاہم فنشنگ فائر پاور کی کمی اور جدوجہد کرنے والی بولنگ یونٹ نے ان کی مہم کو نقصان پہنچایا ہے۔ جوفرا آرچر کی غیر موجودگی میں آر آر کی بولنگ متاثر ہوئی ہے، جو باقی میچوں سے باہر ہو گئے ہیں۔ فارم میں موجود پی بی کے ایس لائن اپ کو روکنے کی ذمہ داری فضل الحق فاروقی، مہیش دکشانا اور آکاش مدھوال پر ہوگی۔ سوائی مان سنگھ اسٹیڈیم کی پچ اس سیزن میں بلے بازی کیلئے سازگار رہی ہے، جس میں پہلی اننگز کا اوسط اسکور۱۹۵؍رن رہا ہے۔ میچ شدید گرمی میں کھیلا جائے گا، جس میں درجہ حرارت۴۲؍ ڈگری سیلسیس تک پہنچنے کی توقع ہے۔ راجستھان رائلز کی ٹیم جہاں اپنی ساکھ بچانے اور اپنی بینچ اسٹرینتھ کو پرکھنے کی کوشش کرے گی، وہیں پنجاب کنگز کی توجہ پلے آف میں اپنی پوزیشن مضبوط کرنے اور ممکنہ طور پر ٹیبل میں سرفہرست رہنے پر مرکوز ہوگی۔ 
مختصر وقفے کے بعد شروع ہونے والے آئی پی ایل میں دونوں ٹیمیں اپنے اپنے شائقین کی تفریح کرنا چاہیں گی۔ دونوں ٹیموں کے کھلاڑی چاہیں گے کہ وہ جیت کے ساتھ اپنےمداحوں کو خوش ہونے کا موقع دیں۔ حالانکہ کھلاڑیوں کا کہنا ہےکہ اس وقفے سے ان کے کھیل پر زیادہ اثر نہیں ہوگا کیونکہ انہوں نے اپنی پریکٹس جاری رکھی تھی اور وہ ورزش وغیرہ بھی کیا کرتے تھے۔