آسٹریلیا کے مایہ ناز کرکٹر نے کہاکہ مارکو جینسن نے تیز گیند باز کگیسو ربادا کے ساتھ اچھی جوڑی بنائی ہے۔

آسٹریلیا کے سابق کپتان رکی پونٹنگ کا ماننا ہے کہ جنوبی افریقہ کے نوجوان گیند باز مارکو جینسن کا مستقبل روشن ہے اور وہ  دنیا کے بہترین ٹیسٹ آل راؤنڈر بن سکتے ہیں۔ انڈ ین پریمیر لیگ (آئی پی ایل) میں مارکو جینسن کی کوچنگ کے دوران پونٹنگ نے ان کی صلاحیتوں کو قریب سے دیکھا۔ 
 آئی سی سی ہال آف فیمر رکی پونٹنگ نے کہا کہ ’’مارکو جینسن کرکٹ کے طویل قد کھلاڑیوں میں سے ایک ہیں، لیکن ان کی صلاحیت بھی اتنی ہی منفرد ہے۔ انہوں نے  جنوبی افریقہ  کے لیے شروعات میں شاندار کارکردگی پیش کی، کگیسو ربادا کے ساتھ مل کر ایک شاندار تیز گیند بازی جوڑی بنائی، جس نے ورلڈ ٹیسٹ چمپئن  شپ فائنل کے پہلے دن آسٹریلیا کے ٹاپ آرڈر پر قہر ڈھایا۔‘‘
 ربادا کی لارڈس میں ایک اور ۵؍ وکٹ لینے پر   زیادہ تعریف ہوئی  ، لیکن جینسن کی گیند بازی بھی اتنی ہی متاثر کن تھی۔ بائیں ہاتھ کے اس گیند باز نے ۱۴؍ اوورس میں ۴۹؍  رن دے کر۳؍ وکٹ لئے، جن میں مارنس لبوشین اور ٹریوس ہیڈکا وکٹ بھی  شامل تھا۔ دوسرے دن فیلڈنگ کے دوران انگلی میں چوٹ لگنے کی وجہ سے ان کا دن خراب ہو گیا تھا، لیکن اس کے فوراً بعد  واپس آ کر انہوں نے ثابت کر دیا کہ وہ نڈر ہیں اور مارنس لبوشین کو۲۲؍ رن پر آؤٹ کر دیا۔
 جینسن ابھی صرف ۲۵؍ سال کے ہیں۔ ۲۰۲۵ء کے آئی پی ایل میں جینسن نے پنجاب کنگز کے ساتھ اپنی صلاحیتوں کا مظاہرہ کیا، مسلسل کامیاب وکٹ لئے اور کبھی کبھار اہم رن  بھی بنائے۔ ہندوستان  میں ان کی  ڈومیسٹک مہم نے کرکٹ کے لیجنڈ رکی پونٹنگ کو آل راؤنڈر کے بارے میں قریب سے جاننے کا موقع دیا۔