کائلین ایمباپے کی شاندار کارکردگی کی بدولت ریئل میڈرڈ نے ہسپانوی لیگ لا لیگا میں ویلنسیا کو۴۔صفر  سے شکست دے دی۔ اس جیت میں ایمباپے نے ۲؍ گول کئے۔ ایمباپے اس سیزن میں ۱۷؍ میچوں میں ۲۱؍گول کر چکے ہیں۔ 

میچ سے ایک دن پہلے ایمباپے کو پچھلے سیزن میں یوروپین فٹبال کے ٹاپ گول اسکورر رہنے پر گولڈن بوٹ ایوارڈ دیا گیا تھا، جسے انہوں نے میچ کے دوران دکھایا۔ ایمباپے نے سینٹیاگو برنابیو میں کھیلے گئے مقابلے میں ۱۹؍ویں منٹ میں پنالٹی اسپاٹ سے گول کیا اور اس کے بعد کھیل کے ۳۱؍ویں منٹ میں میڈرڈ کی برتری کو دگنا کر دیا۔ 

ہاف ٹائم سے پہلے میڈرڈ کو دوسری پنالٹی ملی تو ونیسیس جونیئر نے اسے لینے کے لئے قدم بڑھایا، حالانکہ ویلنسیا کے گول کیپر جولین ایگیرے زابالا نے ان کی کوشش کو ناکام کردیا۔اس کے کچھ ہی دیر بعد جوڈ بیلنگھم نے میڈرڈ کیلئے تیسرا گول کیا۔ جبکہ الوارو کیریراس نے کھیل کے۸۲؍  ویں منٹ میں گول کر کے ریئل میڈرڈ کا اسکور چار۔صفر کر دیاجو آخر تک برقرار رہا۔ویلنسیا کی  جانب سے کھلاڑیوں نے گول کرنے کی کوشش ضرور کی لیکن ناکام رہے۔

گریزمن نے کیا ۲۰۰؍واں گول

اینٹونی گریزمن نے اپنا ۲۰۰؍واں لا لیگا گول کر کے ایٹلیٹکو میڈرڈ کو سیویا کے خلاف تین صفرسے فتح دلائی۔ انہوں نے ۹۰؍ویں منٹ میں یہ یادگار گول کیا۔ اس جیت کے بعد ایٹلیٹکو پوائنٹس ٹیبل میں چوتھے نمبر پر پہنچ گیا ہے۔

آرسنل کی جیت کا سلسلہ جاری ہے اور لیورپول کی ہار کا سلسلہ بالآخر ختم ہو گیا۔ میکل آرٹیٹا کی ٹیم آرسنل نے  برنلے کے خلاف  دوصفرسے جیت درج کر کے پریمیر لیگ میں ٹاپ پر اپنی برتری ۷؍ پوائنٹس کر لی۔ لیورپول نے بھی ایسٹن ولا کے خلاف دوصفر سے جیت حاصل کر کے ۴؍ میچوں میں ہار کا سلسلہ ختم کیا۔ محمد صلاح نے کلب کیلئے اپنا ۲۵۰؍واں گول کیا۔

ادھر مانچسٹر یونائیٹڈ دوسرے نمبر پر آنے کا موقع گنوا بیٹھا اور ناٹنگھم فاریسٹ میں ۲۔۲؍سے ڈرا کھیلا۔ وہیں چیلسی نے ٹوٹنہم کو ایک صفر سے ہرایا۔