ارجنٹائنا کے عظیم فٹ بالر لیونل میسی نے ایک بار پھر اپنی غیر معمولی صلاحیتوں کا مظاہرہ کرتے ہوئے چار منٹ کے اندر دو گول اسکور کیے، جس کی بدولت انٹر میامی نے میجر لیگ سوکر کے مقابلے میں اٹلانٹا یونائیٹڈ کو اس کے ہوم گراؤنڈ پر ۱۔۳؍گول سے شکست دے دی۔

ارجنٹائنا کے عظیم فٹ بالر لیونل میسی نے ایک بار پھر اپنی غیر معمولی صلاحیتوں کا مظاہرہ کرتے ہوئے چار منٹ کے اندر دو گول اسکور کیے، جس کی بدولت انٹر میامی نے میجر لیگ سوکر (MLS) کے مقابلے میں اٹلانٹا یونائیٹڈ کو اس کے ہوم گراؤنڈ پر ۱۔۳؍گول سے شکست دے دی۔ ۱۷؍ اکتوبر کو کھیلے گئے اس مقابلے میں میسی نے دوسرے ہاف میں ۵۶؍ویں اور ۶۰؍ویں منٹ میں گول کیے، جبکہ جرمن بیرترامے نے پہلے ہاف کے اختتام پر انٹر میامی کو برتری دلائی۔ اٹلانٹا یونائیٹڈ کی جانب سے فافا پیکالٹ نے ۸۹؍ویں منٹ میں پنالٹی پر گول کیا، لیکن میزبان ٹیم شکست سے نہ بچ سکی۔ اس کامیابی کے ساتھ انٹر میامی نے مسلسل تیسری فتح حاصل کی اور اپنی بہترین فارم برقرار رکھی۔ 

Road win. Job done. ✅ https://t.co/Be4OnNkU4Z

— Inter Miami CF (@InterMiamiCF) October 18, 2026

مقابلے کے ابتدائی حصے میں دونوں ٹیموں کے درمیان سخت مقابلہ دیکھنے کو ملا۔ اٹلانٹا یونائیٹڈ نے حملے کرنے کی کوشش کی، لیکن انٹر میامی کے دفاع نے اسے زیادہ مواقع سے فائدہ اٹھانے نہیں دیا۔ پہلے ہاف کے اختتام پر لوئس سواریز کے عمدہ پاس کے بعد جرمن بیرترامے نے ہیڈر کے ذریعے گیند کو جال میں پہنچا کر انٹر میامی کو ۰۔۱؍گول کی برتری دلائی۔ اس گول کی تیاری میں میسی نے بھی اہم کردار ادا کیا۔

یہ بھی پڑھئے:سوریہ کا طلبہ کو مشورہ، ریلز دیکھنے کے بجائے پوڈکاسٹ سنیں، علم میں اضافہ ہوگا

دوسرے ہاف میں میسی نے اپنی بہترین کارکردگی سے میچ پر انٹر میامی کی گرفت مضبوط کردی۔ ۵۶؍ویں منٹ میں انہوں نے بیرترامے کے ساتھ شاندار تال میل قائم کیا، مخالف دفاع کو چکمہ دیا اور بائیں پاؤں سے گیند کو جال میں پہنچا دیا۔ اس گول کے صرف چار منٹ بعد میسی نے دوسرا گول کرکے اٹلانٹا یونائیٹڈ کی واپسی کی امیدوں کو مزید مشکل بنا دیا۔ لوئس سواریز کے خوب صورت پاس پر میسی نے تیزی سے آگے بڑھتے ہوئے دفاعی کھلاڑی کو پیچھے چھوڑا اور گول کیپر لوکاس ہوئیوس کو شکست دے دی۔ اس طرح انٹر میامی کی برتری ۰۔۳؍گول  ہوگئی۔ 
  اٹلانٹا یونائیٹڈ کے خلاف دو گول کرنے کے بعد میسی کے رواں میجر لیگ سوکر سیزن میں گولوں کی تعداد ۲۵؍ ہوگئی۔ وہ لیگ کے سب سے زیادہ گول کرنے والے کھلاڑیوں میں پہلے نمبر پر ہیں اور گولڈن بوٹ کے لیے اپنی پوزیشن مضبوط کرچکے ہیں۔ اس میچ میں میسی نے ایک معاون پاس بھی دیا، جس کے بعد ان کی سیزن میں اسسٹ کی تعداد ۱۵؍ ہوگئی۔ وہ لیگ کی تاریخ کے پہلے کھلاڑی بن گئے ہیں جنہوں نے مسلسل تین سیزن میں کم از کم ۱۵؍اسسٹ فراہم کیے۔ 

یہ بھی پڑھئے:ہوپ پوری سیریز میں بہت آسانی سے رن بنا رہے تھے: شریاس ایّر

انٹر میامی کی اس فتح میں میسی، بیرترامے اور سواریز کے درمیان بہترین تال میل نمایاں رہا۔ بیرترامے نے ایک گول کرنے کے ساتھ میسی کے دونوں گولوں میں معاونت کی، جبکہ سواریز نے بھی گول بنانے میں اہم کردار ادا کیا۔ دوسری جانب اٹلانٹا یونائیٹڈ نے آخری لمحات میں پنالٹی کے ذریعے ایک گول ضرور کیا، لیکن وہ میچ کا نتیجہ تبدیل کرنے میں کامیاب نہ ہوسکی۔ انٹر میامی کی مسلسل تیسری کامیابی نے ٹیم کے حوصلے بلند کردیے ہیں، جبکہ میسی کی شاندار فارم نے لیگ کے آئندہ مقابلوں میں بھی ان سے بڑی توقعات وابستہ کردی ہیں۔