مکے بازی کی عالمی چمپئن شپ میں نکہت نے طلائی تمغہ پر قبضہ کیا اور اپنے خطاب کا دفاع کیا
EPAPER
Updated: March 27, 2023, 2:25 PM IST | New Delhi
مکے بازی کی عالمی چمپئن شپ میں نکہت نے طلائی تمغہ پر قبضہ کیا اور اپنے خطاب کا دفاع کیا
ہندوستان کی ہونہار مکے بازنکہت زرین نے اتوار کو خواتین کی عالمی باکسنگ چمپئن شپ میں ویتنام کی تھی ٹام نگوین کو۰۔۵؍ سے شکست دے کر مسلسل دوسری بار عالمی چمپئن بن گئیں۔نکہت، جنہوں نے پچھلی بار۵۲؍ کلوگرام زمرے میں عالمی چمپئن شپ جیتی تھی، دو بار کی ایشیائی چمپئن نگوین کو شکست دے کر۵۰؍ کلوگرام زمرے میں طلائی تمغہ جیتا۔ نکہت نے سیمی فائنل میں کولمبیا کی انگرڈ ویلنسیا کو شکست دے کر فائنل میں داخلہ حاصل کرلیا۔
دفاعی عالمی چمپئن نے مکے بازی کے آغاز سے ہی درست مکے لگائے اور نگوین کے حملوں کو بے اثر کرنے کیلئے تیزی سے اپنے پیروں کا استعمال کیا۔ نکہت نے پہلا راؤنڈ۰۔۵؍ سے جیت لیا لیکن ویتنامی باکسر نے اچھا مقابلہ کرتے ہوئے دوسرا راؤنڈ۲۔۳؍ سے جیت لیا۔ نکہت نے فیصلہ کن راؤنڈ میں صبر اور جارحیت کا صحیح امتزاج دکھایا تاکہ یہ ظاہر کیا جا سکے کہ وہ دوسری بار عالمی چمپئن بننے کی حقدار ہیں۔ نکہت دوسری ہندوستانی باکسر ہیں جنہوں نے عالمی چمپئن شپ میں دو بار گولڈ میڈل جیتے ہیں۔ نکہت سے پہلے میری کوم (۲۰۰۲ء،۲۰۰۵ء، ۲۰۰۶ء، ۲۰۰۸ء، ۲۰۱۰ء اور ۲۰۱۸ء )۶؍ بار یہ کارنامہ انجام دے چکی ہیں۔
اس تاریخی فتح کے بعد نکہت نے کہاکہ ’’میں دوسری بار عالمی چمپئن بننے پر بہت خوش ہوں، خاص طور پر مختلف وزن کے زمرے میں۔ آج کا میچ پورے ٹورنامنٹ میں سب سے مشکل تھا اور چونکہ یہ ٹورنامنٹ کا آخری میچ تھا اس لئے میں اپنی توانائی کا بھرپور استعمال کرنا چاہتی تھی۔ یہ ایک سخت مقابلہ تھا جس میںہم دونوں کو وارننگ کے ساتھ ساتھ ۸؍ پوائنٹ بھی ملے۔ فائنل راؤنڈ میں میری حکمت عملی پوری طاقت کے ساتھ حملہ کرنا تھی ۔ یہ تمغہ ہندوستان اور ان تمام لوگوں کیلئے ہے جنہوں نے پورے ٹورنامنٹ میں ہمارا ساتھ دیا۔‘‘ نکہت اولمپکس کو ذہن میں رکھتے ہوئے اس سال کے ٹورنامنٹ کیلئے فلائی ویٹ سے لائٹ فلائی ویٹ میں چلی گئی تھیں۔