یو ایس اوپن سے قبل ہارڈ کورٹ پر کوئی میچ نہیں کھیلیں گے۔

 ۲۴؍بار کے گرینڈ سلیم چمپئن نوواک جوکووچ کو آئندہ یو ایس اوپن سے قبل ایک اور جھٹکا لگا ہے۔ انہوں نے سنسناٹی اوپن سے اپنا نام واپس لے لیا ہے، جس کا مطلب ہے کہ اب وہ کسی بھی ہارڈ کورٹ ٹورنامنٹ کی تیاری کے بغیر براہ راست یو ایس اوپن میں حصہ لیں گے۔جوکووچ نے آخری بار ۱۱؍جولائی کو ومبلڈن سیمی فائنل میں شرکت کی تھی، جہاں انہیں یانک سنر کے ہاتھوں سیدھے سیٹوں میں شکست کا سامنا کرنا پڑا تھا۔ اس میچ سے ۲؍ دن قبل، جوکووچ کو کوارٹر فائنل کے آخری گیم میں خوفناک اور عجیب طریقےسے گرتے ہوئے دیکھا گیا تھا، جس سے ان کی بائیں ران متاثر ہوئی تھی۔ سیمی فائنل میں وہ مکمل طور پر فٹ نظر نہیں آئے اور انہیں کورٹ پر اپنی حرکت میں دشواری ہو رہی تھی۔ میچ کے دوران انہوں نے  بائیں پیر کا علاج بھی کروایا تھا۔اُس تکلیف سے وہ جوکووچ پوری طرح ٹھیک نہیں سکے ہیں اور اسی وجہ سے انہوںنے سنسناٹی اوپن سے نام واپس لیا ہے۔
 سنسناٹی سے قبل جوکووچ نے اس ہفتے ختم ہونے والے ٹورنٹو ماسٹرز میں بھی حصہ نہیں لیا تھا، جس کی وجہ انہوں نے کمر کی پٹھوں میں چوٹ بتائی تھی۔ومبلڈن سے پہلے انہوں نے فرینچ اوپن میں حصہ لیا تھا، جہاں انہیں ایک بار پھر یانک سنر کے ہاتھوں سیمی فائنل میں شکست کا سامنا کرنا پڑا تھا۔اب جوکووچ کے پاس یو ایس اوپن سے قبل کسی بھی ہارڈ کورٹ مقابلے کی پریکٹس نہیں ہوگی۔ یو ایس اوپن ۲۴؍اگست سے شروع ہو رہا ہے۔ جوکووچ اس ٹورنامنٹ میں اب تک ۴؍ بار چمپئن بن چکے ہیں، جن میں آخری خطاب انہوں نے ۲۰۲۳ءمیں جیتا تھا، جو ان کا اب تک کا سب سے حالیہ گرینڈ سلیم خطاب بھی ہے۔