دنیا کے امیر ترین شخص ایلون مسک  نے اپنے ۲۰۱۸ء کے معاوضے کے پیکیج کیس میں بڑی فتح حاصل کی ہے۔جمعہ کو، ڈیلاویئر سپریم کورٹ نے نچلی عدالت کے اس فیصلے  کے برعکس فیصلہ سنایاجس میں مسک  کے ۵۶؍ارب ڈالر کے معاوضے کے پیکیج کو منسوخ کر دیا گیا تھا۔ٹیسلاکے حصص کی قیمت میں اضافے کی وجہ سے پیکیج اب تقر یباً۱۳۹؍ارب ڈالر (تقریباً۱۲؍ لاکھ کروڑ روپے) کا ہے۔نچلی عدالت نے تقریباً دو سال قبل اس معاہدے کو ’ناقابل تصور‘ قرار دیتے ہوئے روک دیا تھا۔فیصلے سے مسک کو راحت ملی ہے اور یہ ٹیسلا پر مسک کے کنٹرول کو مزید مضبوط کرے گا جس سے متعلق  وہ ان دنوں مسلسل فکرظاہر کرتے رہے ہیں۔

اپنے۴۹؍ صفحات پرمشتمل فیصلے میں سپریم کورٹ نے کہا  کہ۲۰۲۴ء کے آغاز میں ادائیگی پیکیج کو مکمل طور پر منسوخ کرنے کا فیصلہ غیر منصفانہ  تھا اور اس طرح مسک کے ساتھ انصاف نہیں کیا گیا۔ عدالت نے کہا کہ پیکیج کی منسوخی سے مسک کو ان کی ۶؍ سال کی محنت کا کوئی معاوضہ نہیں ملتا۔

جمعہ کو مارکیٹ بند ہونے پرٹیسلاکے حصص کی قیمت کی بنیاد پر ۲۰۱۸ء  کےپیکیج کی مالیت اس وقت تقریباً ۱۳۹؍ ارب ہے۔ ٹیسلا کے سرمایہ کار ڈیپ واٹر اسیٹ مینجمنٹ کے منیجنگ پارٹنر جین مونسٹر نے کہا کہ یہ مسک کے لیے ایک جیت ہے کیونکہ  اس فیصلے کے بعد اب وہ تیزی سے کمپنی  پرکنٹرول حاصل کر لیں گے۔

اگر ایلون  مسک۲۰۱۸ء کے پیکیج میں دیے گئے تمام اسٹاک  متبادلات کو استعمال کرتے ہیں تو ٹیسلا میں ان کے حصص کا تناسب موجودہ۱۲ء۴؍فیصد سے بڑھ کر۱۸ء۱؍فیصدہوجائےگا ۔ تاہم، اسے یہ حصص حاصل کرنے کیلئے کمپنی کی کارکردگی کے اہداف کو پورا کرنا ہوگا۔ ٹیسلا نے اس معاملے پر فوری طور پر کوئی تبصرہ نہیں کیا، لیکن مسک نے سوشل میڈیا پلیٹ فارم ایکس پر پوسٹ کیا’’میں درست ثابت ہوا۔‘‘

۲۰۱۸ء میں، ٹیسلا کے بورڈ نے مسک کے لیے ایک بڑے ادائیگی پیکیج کی منظوری دی تھی۔ اس معاہدے کے تحت، اگر ٹیسلا مارکیٹ کے کچھ اہم اہداف حاصل کر لیتی ہے، تو مسک کوکمپنی کے تقریباً۳۰۴؍ملین شیئرز انتہائی رعایتی قیمت پر خریدنے کا اختیار  حاصل ہوگا۔ ٹیسلا نے ان تمام اہداف کو حاصل کیالیکن جیسے ہی شیئر ہولڈرز نے پیکیج کی منظوری دی، رچرڈ ٹورنیٹا نامی سرمایہ کار نے مقدمہ کر دیا۔ ٹورنیٹا کے پاس  ٹیسلا کے صرف۹؍ شیئر تھے ۔ ۲۰۲۴ء کے اوائل میں، پانچ دن کی سماعت کے بعد، ڈیلاویئر سپریم کورٹ کی جج کیتھلین میک کارمک نے پیکیج کو کالعدم قرار دیتے ہوئے کہا کہ ٹیسلا کے ڈائریکٹر فیصلہ کرنے میں غیر جانبدار نہیں تھے اور اہم حقائق شیئر ہولڈرز سے چھپائے گئے تھے۔

واضح رہےکہ دنیا کے امیر ترین افرادمیں۶۰ء۹۸؍ لاکھ کروڑ روپے کی مجموعی دولت کے ساتھ ایلون مسک سرفہرست ہیں۔اس کے بعد گوگل کے لیری پیج ہیںجن کی مجموعی دولت ۲۲ء۳۳ ؍ لاکھ کروڑ ہے۔تیسرے نمبر پر اوریکل کے لیری ا یلیسن ہیں جن کی مجموعی دولت ۲۱ء۶۹؍ لاکھ کروڑ روپے ہے۔چوتھےنمبر ۲۱ء۳۶؍ لاکھ کروڑ کی دولت کے ساتھ امیزون کے جیف بیزوس ہیں۔