ٹیم انڈیا کے ہیڈ کوچ نے کہاکہ ہاں، انہیں واپس لانا اور انہیں بولنگ کرتے دیکھنا بہت اچھا ہے۔ جسپریت ایک ایسے کھلاڑی ہیں جنہیں ہم نے پچھلے ۲؍برسوں میں بہت یاد کیا ہے

ہندوستان کے ہیڈ کوچ راہل  دراوڑ نے۲۰۲۳ء ون ڈے ورلڈ کپ سے قبل جسپریت بمراہ کی ٹیم میں واپسی پر اپنی جوشی کا اظہار کیا۔ بمراہ آئرلینڈ کی ٹی۲۰؍ سیریز میں لوٹنے  سے پہلے کمر میں اسٹریس فریکچر کی وجہ سے تقریباً ایک سال تک کرکٹ سے دور تھے۔ اب ورلڈ کپ سے پہلے بمراہ سری لنکا میں ہونے والے ایشیا کپ۲۰۲۳ء میں ہندوستان کی نمائندگی کریں گے۔ دراوڑ ان کی واپسی پر خوش ہیں، حالانکہ ٹیم بمراہ کے کام کے بوجھ کو احتیاط سے سنبھالے گی۔
 دراوڑ نے کہاکہ ’’ہاں، انہیں واپس لانا اور انہیں بولنگ کرتے دیکھنا بہت اچھا ہے۔ جسپریت ایک ایسے کھلاڑی ہیں جنہیں ہم نے پچھلے ۲؍برسوں میں بہت یاد کیا ہے۔ مجھے یہ کہنا ضروری ہے کہ انہوں نے زیادہ میچ نہیں کھیلے ہیں، لیکن انہیں واپس لانا اچھا ہے اور ہم  انہیں آہستہ آہستہ ٹیم میں شامل کرلیں گے۔‘‘  دراوڑ نے پرسدھ کرشنا کے بمراہ کے ساتھ واپسی کرنے پر کہاکہ ’’وہ ۴؍ اوور ان دونوں کیلئے آئرلینڈ کے دورے پر اچھی پریکٹس تھے، جس سے انہیں بولنگ میں کچھ آسانی ہوئی۔ اب ایشیا کپ میں ہمیں اس مشق کو آگے بڑھانے کا موقع ملا ہے۔ ہمارے پاس ورلڈ کپ سے پہلے تیاری کیلئے پورا ایک مہینہ ہے۔ یہ ہمیں تیز گیندبازی کے شعبے میں مزید متبادل فراہم کرتے ہیں۔ یہ ہمیں زیادہ وسائل رکھنے کا موقع فراہم کرتا ہے، خاص طور پر ورلڈ کپ جیسے طویل ٹورنامنٹ میں۔‘‘
خیال رہے کہ ایشیا کپ کا فائنل۱۷؍ ستمبر کو کھیلا جائے گا، جب کہ ہندوستان اپنی ون ڈے ورلڈ کپ مہم۸؍ اکتوبر کو شروع کرے گا۔ ہیڈ کوچ کے طور پر اپنے پہلے ورلڈ کپ میں دراوڑ نے ٹیم کی تیاری پر اعتماد کا اظہار کیا اور اچھے مظاہرہ کی امید ظاہر کی۔ دراوڑ نے کہاکہ ’’اس (ورلڈ کپ) سے  دباؤ جڑا ہوگا، جو خوش آئند ہے اور مجھے لگتا ہے کہ ہم سب اس کی امید کرتے ہیں۔ اپنے گھریلو ہجوم، ہمارے شائقین کے سامنے کھیلنے کے قابل ہونا، سب کیلئے بہت خاص ہونے والا ہے اور ہمیں امید ہے کہ ہمارے پاس ایک اچھا ٹورنامنٹ ہوگا۔‘‘انہوں نے کہاکہ ’’مجھے لگتا ہے کہ ہم نے تیاری کر لی ہے، ہم اچھی تیاری کر رہے ہیں۔ اس ٹورنامنٹ میں کچھ بہت اچھی ٹیمیں ہوں گی۔ میرے خیال میں آئی پی ایل جیسے ٹورنامنٹ پر غور کرتے ہوئے یہ کہا جا سکتا ہے کہ ہندوستان کو گھریلو حالات کا فائدہ  ہوگا۔ ہمیں یقین ہے کہ ہم اچھی کارکردگی کا مظاہرہ کریں گے اور ہم واقعی پرجوش ہیں۔ میں بطور کوچ اس کا منتظر ہوں۔‘‘