ہندوستانی وکٹ کیپر بلے باز رشبھ پنت بائیں جانب کھنچاؤ (لیفٹ سائیڈ اسٹرین) کے باعث نیوزی لینڈ کے آئندہ دورے پر انڈیا اے کے ابتدائی دو مقابلوں سے باہر ہو گئے ہیں۔ ان کی جگہ نوجوان وکٹ کیپر بلے باز کمار کشاگرا کو ٹیم میں شامل کیا گیا ہے۔

 ہندوستانی  وکٹ کیپر بلے باز رشبھ پنت بائیں جانب کھنچاؤ (لیفٹ سائیڈ اسٹرین) کے باعث نیوزی لینڈ کے آئندہ دورے پر انڈیا اے کے ابتدائی دو مقابلوں سے باہر ہو گئے ہیں۔ ان کی جگہ نوجوان وکٹ کیپر بلے باز کمار کشاگرا کو ٹیم میں شامل کیا گیا ہے۔ ہندوستانی کرکٹ کنٹرول بورڈ (بی سی سی آئی) نے پیر کے روز اس تبدیلی کی تصدیق کی۔ پنت کی اس دورے میں شرکت کا انحصار ان کی جسمانی فٹنس پر تھا۔ یکم سے۴؍ اکتوبر کے درمیان جموں و کشمیر کے خلاف ایرانی کپ میں ریسٹ آف انڈیا ٹیم کی قیادت کرتے ہوئے انہیں وائرل بخار بھی ہو گیا تھا۔ اس کے بعد ان کی صحت اور فٹنس پر مسلسل نظر رکھی جا رہی تھی۔

یہ بھی پڑھئے:لیورپول کو اپنے ہی میدان پر مانچسٹر سٹی کے ہاتھوں ۰۔۳؍گول سے شکست

بی سی سی آئی کے سکریٹری دیوجیت سائیکیا نے بتایا کہ ۲۹؍سالہ رشبھ پنت طبی ٹیم کی نگرانی میں ہیں اور ان کی صحت میں بہتری آ رہی ہے۔ انہوں نے کہا کہ نیوزی لینڈ کے شہر لنکن میں ۷؍ اکتوبر سے شروع ہونے والے تیسرے مقابلے میں پنت کی شرکت کے بارے میں فیصلہ بعد میں کیا جائے گا۔ سائیکیا کے مطابق، مردوں کی انتخابی کمیٹی نے ابتدائی دو میچوں کے لیے پنت کی جگہ کمار کشاگرا کو منتخب کیا ہے۔
جھارکھنڈ سے تعلق رکھنے والے ۲۱؍ سالہ کمار کشاگرا دھرو جوریل کی قیادت والی انڈیا اے ٹیم میں شامل ہو گئے ہیں۔ ٹیم میں یشسوی جیسوال، سائی سدرشن، کے ایل راہل، عاقب نبی، مکیش کمار، آکاش دیپ، مانَو سُتھار اور واشنگٹن سندر جیسے کھلاڑی بھی موجود ہیں۔ کمار کشاگرا حال ہی میں پڈوچیری میں آسٹریلیا اے کے خلاف انڈیا اے کے چار روزہ مقابلوں میں اچھی کارکردگی کا مظاہرہ کر چکے ہیں۔ انہوں نے پہلے میچ میں  ۱۱۳؍ اور ۴۶؍ رنز کی اننگز کھیل کر ٹیم کی جیت میں اہم کردار ادا کیا تھا۔ ان کی اس کارکردگی نے انتخاب کاروں کی توجہ حاصل کی اور اب انہیں نیوزی لینڈ کے خلاف اپنی صلاحیتیں دکھانے کا موقع ملا ہے۔

یہ بھی پڑھئے:فلم ’’مونسٹر‘‘ کی شوٹنگ آخری مرحلے میں، نومبر میں تکمیل کی امید

انڈیا اے اور نیوزی لینڈ کے درمیان ہونے والی یہ سیریز دونوں ٹیموں کے لیے اہم تیاری سمجھی جا رہی ہے۔ اس کے ذریعے کھلاڑیوں کو ویلنگٹن اور کرائسٹ چرچ میں ہونے والی دو ٹیسٹ میچوں کی سیریز سے قبل اپنی فارم اور کارکردگی بہتر بنانے کا موقع ملے گا۔ یہ ٹیسٹ سیریز عالمی ٹیسٹ چیمپئن شپ کے فائنل میں جگہ بنانے کی دوڑ کے لحاظ سے بھی اہمیت رکھتی ہے، اس لیے دونوں ٹیمیں تیاری کے ان مقابلوں سے زیادہ سے زیادہ فائدہ اٹھانا چاہیں گی۔نیوزی لینڈ دورے کے لیے انڈیا اے کی تازہ ترین ٹیم: دھرو جوریل (کپتان اور وکٹ کیپر)، یشسوی جیسوال، کے ایل راہل، دیودت پڈیکل، روی چندرن سمارن، واشنگٹن سندر، عاقب نبی، آکاش دیپ، انشول کمبوج، مانَو سُتھار، مکیش چودھری، سائی سدرشن، یش راٹھوڑ، مکیش کمار اور کمار کشاگرا (وکٹ کیپر)۔