ٹورنامنٹ میں ہندوستانی جوڑی نے ملائیشیا کے جنیدی عارف اور رائے کنگ کو شکست دے دی۔

ہندوستانی شٹلرز چراغ شیٹی اور ساتوک سائراج رینکیریڈی کی ٹاپ سیڈ ڈبلز جوڑی نے جمعہ کو تھائی لینڈ اوپن۲۰۲۴ء کے راؤنڈ آف ۸؍ میں ملائیشیا کے جنیدی عارف اور رائے کنگ کی جوڑی کو شکست دے کر سیمی فائنل میں داخلہ حاصل کیا۔ 
جمعہ بنکاک میں کھیلے جانےوالے اس سپر ۵۰۰؍ ٹورنامنٹ میں ہندوستانی مردوں کی ڈبلز جوڑی نے ملائیشیا کی جوڑی کو۳۸؍ منٹ تک چلے میچ میں ۷۔ ۲۱، ۱۴۔ ۲۱؍ سے شکست دی۔ چراغ-ساتوک کی جوڑی نے مضبوط شروعات کی اور ملائیشیا کی جوڑی پر دباؤ برقرار رکھا۔ ۳۔ ۵؍کے اسکور کے بعد ہندوستانی جوڑی نے لگاتار پوائنٹس حاصل کرکے اپنی برتری کو۳۔ ۱۱؍ تک بڑھا دیا۔ اس کے بعد ملائیشیا کی جوڑی نے واپسی کی کوشش کی لیکن چراغ-ساتوک کی جوڑی نے پہلا گیم۷۔ ۲۱؍ سے جیت لیا۔ 
  دوسرے گیم میں ملائیشین جوڑی کے ساتھ سخت مقابلہ ہوا لیکن ہندوستانی جوڑی ان پر غالب رہی۔ اس گیم میں چراغ-ساتوک نے شاندار کارکردگی کا مظاہرہ کرتے ہوئے جنید- رائےکی جوڑی کو۱۴۔ ۲۱؍ سے شکست دی۔ سنیچر کو ہونے والے سیمی فائنل میچ میں ہندوستانی مردوں کے ڈبلز کی ٹاپ جوڑی کا مقابلہ چینی تائپے کے منگ چی لو اور تانگ کائی وی سے ہوگا۔