ہندوستانی خواتین ہاکی ٹیم کی گول کیپر سویتا، جنہوں نے۲۰۲۱ء اور ۲۰۲۲ء میں ایف آئی ایچ گول کیپر آف دی ایئر ایوارڈ جیتا تھا۔

 ہندوستانی خواتین ہاکی ٹیم کی گول کیپر سویتا، جنہوں نے۲۰۲۱ء اور ۲۰۲۲ء میں ایف آئی ایچ گول کیپر آف دی ایئر ایوارڈ جیتا تھا، کو اس سال کے ایف آئی ایچ ہاکی اسٹارس ایوارڈس میں اسی زمرے میں مسلسل تیسری بار نامزد کیا گیا ہے۔ اس سلسلے میں اپنی خوشی کا اظہار کرتے ہوئے سویتا نے اس اعزاز کو ٹیم کے نام وقف کرتے ہوئے کہا کہ میں نے کبھی سوچا بھی نہیں تھا کہ میں مسلسل ۲؍ سال تک یہ ایوارڈ جیتوں گی اور دوبارہ نامزد ہو جاؤں گی۔ میں واقعی بہت اچھا محسوس کر رہی ہوں اور یہ میرے، میرے خاندان اور میرے ساتھی ساتھیوں کیلئے بھی فخر کا لمحہ ہے۔ جب میں نے کھیلنا شروع کیا تو میں نے کبھی سوچا بھی نہیں تھا کہ میں یہاں تک آؤں گی اور یہ سب میرے خاندان اور اپنے ساتھیوں کی حمایت کی وجہ سے ہے۔انہوں نے کہا کہ ٹیم اسپورٹس میں کوئی بھی کامیابی انفرادی کوششوں پر مبنی نہیں ہوتی بلکہ ٹیم ورک کا نتیجہ ہوتی ہے۔ آپ کی محنت کیلئے پہچانا جانا بہت اچھا لگتا ہے اور اس سے پوری ٹیم کی حوصلہ افزائی ہوتی ہے۔ سویتا نے حالیہ برسوں میں ہندوستان کو کئی اہم جیت دلائی ہے، جن میں اسپین میں ایف آئی ایچ ہاکی خواتین کپ۲۰۲۲ء میں خطاب جیتنا بھی شامل ہے۔