ہندوستان کی سری چرنِی اور دپتی شرما نے آئی سی سی خواتین کی ٹی ۲۰؍گیندبازی رینکنگ میں بالترتیب پہلے اور دوسرے مقام پر اپنی جگہ برقرار رکھی، جبکہ ایشین گیمز میں شاندار کارکردگی کے بعد شیفالی ورما بلے بازوں کی فہرست میں ٹاپ چار میں شامل ہوگئیں۔

ہندوستان کی سری چرنِی اور دپتی شرما نے آئی سی سی خواتین کی ٹی ۲۰؍گیندبازی رینکنگ میں بالترتیب پہلے اور دوسرے مقام پر اپنی جگہ برقرار رکھی، جبکہ ایشین گیمز میں شاندار کارکردگی کے بعد شیفالی ورما بلے بازوں کی فہرست میں ٹاپ چار میں شامل ہوگئیں۔ شیفالی نے بلے سے شاندار کارکردگی کا مظاہرہ کرتے ہوئے اپنی پہلی ٹی ۲۰؍ سنچری بنانے کے بعد چوتھا مقام حاصل کیا۔ انہوں نے ایشین گیمز کے سیمی فائنل میں بنگلہ دیش کے خلاف ۴۹؍ گیندوں پر ناٹ آؤٹ سنچری بنائی۔

A maiden T20I century to remember for Shafali Verma 🤩💪

More 👉 https://t.co/KLt0WCNoNd pic.twitter.com/ECRxkR9BaH

— ICC (@ICC) September 21, 2026

یہ بھی پڑھئے:ایشین گیمز: ۶۸؍ سال بعد فلپائن نے مردوں کی فٹبال میں پہلی کامیابی حاصل کی

سری چرنِی اور دپتی گیندبازی رینکنگ میں سرفہرست رہیں، جبکہ ان کی ہندوستانی ساتھی کرانتی گاؤڑ اور نندنی شرما نے بھی نمایاں بہتری حاصل کی۔ گاؤڑ ۱۵؍ مقام کی چھلانگ لگا کر ۵۷؍ویں نمبر پر پہنچ گئیں، جبکہ نندنی ۲۲؍ مقام اوپر چڑھ کر ۷۲؍ویں نمبر پر آگئیں۔ گزشتہ ہفتے اپنی کارکردگی کے بعد دونوں نے کریئر کے بہترین ریٹنگ پوائنٹس حاصل کیے۔

یہ بھی پڑھئے:اللو ارجن اور ایٹلی کی ’’راکا‘‘نے ۳۷؍ فنکاروں کے موشن کیپچر کے ساتھ گنیز ورلڈ ریکارڈ بنا لیا

پاکستان کی کئی کھلاڑیوں نے بھی نمایاں پیش رفت کی۔ ایشین گیمز کے کوارٹر فائنل اور سیمی فائنل میں بالترتیب ۲۵؍ اور۵۴؍ رنز بنانے کے بعد شوال ذوالفقار بلے بازوں کی فہرست میں ۱۶؍ مقام اوپر چڑھ کر ۲۹؍ویں نمبر پر پہنچ گئیں اور کیریئر کے بہترین  ۵۵۸؍ ریٹنگ پوائنٹس حاصل کیے۔ عائشہ ظفر نے اس سے بھی بڑی چھلانگ لگائی۔ وہ ۳۱؍ مقام اوپر چڑھ کر۴۰؍ویں نمبر پر پہنچیں اور کریئر کے بہترین ۴۸۹؍ ریٹنگ پوائنٹس حاصل کیے۔ انہوں نے ایشین گیمز میں سری لنکا کے خلاف ۷۱؍ رنز بنائے تھے اور آل راؤنڈر رینکنگ میں بھی نو مقام کی بہتری کے ساتھ ۳۰؍ویں نمبر پر پہنچ گئیں۔پاکستان کی کپتان فاطمہ ثنا ٹی ۲۰؍ گیندبازوں کی فہرست میں پانچ مقام اوپر چڑھ کر ۲۴؍ویں نمبر پر پہنچ گئیں، جبکہ تھائی لینڈ کی اونِچا کام چومفو پاکستان کے خلاف تین وکٹ لینے کے بعد چھ مقام کی بہتری کے ساتھ مشترکہ طور پر ۶۳؍ویں نمبر پر آگئیں۔تازہ ترین رینکنگ میں زمبابوے کے خلاف جنوبی افریقہ کی ۰۔۵؍ سے ٹی۲۰؍ سیریز کی کارکردگی کا بھی اثر نظر آیا۔ سیریز میں سب سے زیادہ رنز بنانے والی کھلاڑی اینیک بوش آٹھ مقام اوپر چڑھ کر ۴۶؍ویں نمبر پر پہنچ گئیں اور ٹاپ ۵۰؍ میں شامل ہوگئیں۔ نوجوان کھلاڑی میانے سمِٹ کے لیے بھی یہ سیریز شاندار رہی اور وہ کریئر کے بہترین مشترکہ ۵۳؍ویں مقام پر پہنچ گئیں۔ زمبابوے کی نیاشا گوانجُرا گیندبازی رینکنگ میں ۲۸؍ مقام کی بہتری کے ساتھ ۸۷؍ویں نمبر پر پہنچ گئیں اور ٹاپ ۱۰۰؍ میں شامل ہوگئیں، جبکہ جنوبی افریقہ کی اینیری ڈرکسن کریئر کے بہترین ۱۷۹؍ ریٹنگ پوائنٹس حاصل کرنے کے بعد آل راؤنڈر رینکنگ میں ۲۲؍ویں مقام پر پہنچ گئیں۔