سلیکٹر اجیت آگرکر نے روہت شرما کے ہمراہ ۱۷؍رکنی اسکواڈ کا اعلان کیا۔ یزویندر چہل ٹیم سے باہر اور سنجو سیمسن اضافی کھلاڑی

کے ایل راہل اور شریس ایّر نے اپنی اپنی چوٹ سے صحت یاب ہو کر ہندوستان کی۱۷؍ رکنی ایشیا کپ ٹیم میں جگہ بنا لی ہے۔ بورڈ آف کنٹرول فار کرکٹ ان انڈیا (بی سی سی آئی) نے پیر کو اس کا اعلان کیا۔
 ایّرجہاں کمر کی چوٹ اور سرجری سے بحالی سے گزر رہے تھے، وہیں راہل نے ران میں چوٹ لگنے کے بعد سرجری کروائی تھی۔ قومی دارالحکومت میں سلیکٹرس کمیٹی کے چیئرمین اجیت آگرکر کے ذریعہ اعلان کردہ ایشیا کپ کے۱۷؍ رکنی اسکواڈ میں بائیں ہاتھ کے نوجوان بلے باز تلک ورما بھی شامل ہیں ، جنہوں نے ابھی تک ون ڈے کرکٹ نہیں کھیلا ہے۔
 آئرلینڈ میں جاری کردہ ٹی ۲۰؍ سیریز کے ذریعے بین الاقوامی کرکٹ میں لوٹنے والے تیز گیندباز جسپریت بمراہ اور پرسدھ کرشنا بھی ایشیا کپ کی ٹیم میں جگہ بنانے میں کامیاب رہے ہیں ۔ محمد سمیع ویسٹ انڈیز کے پورے دورے میں آرام کے بعد واپس آئے ہیں ، جبکہ محمد سراج، آل راؤنڈر ہاردک پانڈیا اور شاردُل ٹھاکر پیس اٹیک مکمل کر رہے ہیں ۔
 تلک کے انتخاب پر آگرکر نے کہا کہ’’ہم نے ویسٹ انڈیز میں کچھ حقیقی صلاحیت دیکھی، نہ صرف کارکردگی کے لحاظ سے بلکہ مزاج کے لحاظ سے بھی۔ انہوں نے ہمیں اسے ٹیم کے ساتھ لے جانے کا موقع فراہم کیا ہے۔ خوش قسمتی سے ہم۱۷؍ کھلاڑیوں کو چن سکتے ہیں ۔ ورلڈ کپ ۲۰۱۷ء میں یہ تعداد کم ہو کر۱۵؍ رہ جائے گی۔ وقت آنے پر ہم اس کا فیصلہ کریں گے، لیکن فی الحال کوچ اور کپتان کے پاس انہیں ٹیم میں شامل کرنے کا موقع ہے۔‘‘تجربہ کار لیگ اسپنر یزویندر چہل کو اسکواڈ سے باہر کردیا گیا جبکہ کلدیپ یادو کو اکیلے کلائی اسپنر کے طور پر ترجیح دی گئی۔ رویندر جڈیجا اور اکشر پٹیل اسکواڈ میں دو لیفٹ آرم اسپنر ہیں جبکہ ٹیم میں کوئی آف اسپنر نہیں ہے۔ ہندوستانی ٹیم کے کپتان روہت شرما نے پریس کانفرنس میں کہاکہ ’’ہم نے (روی چندرن) اشون اور واشی (واشنگٹن سندر) کو آف اسپنر کے طور پر بھی سوچا تھا لیکن اب آپ دیکھتے ہیں کہ چہل کو باہر کرنا پڑا کیونکہ ہم صرف ۱۷؍ کھلاڑیوں کو منتخب کرسکتے تھے۔
 کپتان روہت شرما نے کہا کہ `انہیں صرف اس وقت منتخب کیا جا سکتا تھا جب کوئی تیز گیندباز باہر ہو، ہم ایسا نہیں کر سکتے کیونکہ اگلے ۲؍ ماہ میں تیز گیندباز بڑا کردار ادا کرنے والے ہیں ، ان میں سے کچھ طویل عرصے بعد واپس آ رہے ہیں ، اس لئے ہم انہیں اچھی طرح سے دیکھنا چاہتے ہیں ۔ ٹیم کے دروازے کسی کے لئے بند نہیں ہوئے ہیں ، کوئی بھی کسی بھی وقت آ سکتا ہے۔ واشی یا اشون پر بھی یہی بات نافذ ہوتی ہے۔ 
 ایشان کشن کو راہل کے بعد دوسرے وکٹ کیپر کے طور پر منتخب کیا گیا، حالانکہ چیف سلیکٹر اجیت آگرکر نے کہا کہ راہل ابھی بھی پوری طرح سے فٹ نہیں ہیں ، اس لئے سنجوسیمسن اضافی کھلاڑی کی حیثیت سے لنکا کا سفر کریں گے۔
 آگرکر نے کہا کہ ’’ہم نے ان۱۸؍ کھلاڑیوں کو منتخب کیا ہے۔ (ورلڈ کپ اسکواڈ) ان کھلاڑیوں کے آس پاس ہو گا۔ کچھ اہم کھلاڑی انجری سے واپس آ رہے ہیں ۔ امید ہے کہ ان کے ساتھ سب کچھ ٹھیک ہو گا۔ ان کے پاس اب ایشیا کپ ہے۔ ہندوستان میں چند میچوں اور بنگلور میں ایک مختصر کیمپ، جس کے بعد ہم ورلڈ کپ اسکواڈ کا اعلان کرنے سے پہلے چند میچ کھیلیں گے، لیکن یہ بالکل واضح ہے کہ اسکواڈ بہت مماثل ہو گا۔روہت نے کہاکہ ’’میں اس ٹیم سے چاہتا ہوں کہ ہر کوئی کہیں بھی بلے بازی کر سکے۔ آپ کو لچک کی ضرورت ہے۔ کسی کو یہ نہیں کہنا چاہئے کہ `میں اس جگہ پر بیٹنگ کرنے میں اچھا ہوں یا میں اس جگہ اچھا ہوں ۔ آپ چاہتے ہیں کہ لوگ کہیں بھی بلے بازی کرنے کے قابل ہوں ، ہر کھلاڑی کیلئے یہی پیغام ہے۔‘‘خیال رہے کہ ایشیا کپ کا آغاز۳۰؍ اگست کو ملتان میں پاکستان اور نیپال کے درمیان میچ سے ہوگا۔ ہندوستان کا گروپ اے کا پہلا میچ ۲؍ ستمبر کو پلیکل میں پاکستان کے خلاف ہے جس کے بعد وہ ۴؍ ستمبر کو نیپال سے کھیلے گا۔ گروپ بی میں بنگلہ دیش، افغانستان اور سری لنکا شامل ہیں ۔ ہر گروپ سے ٹاپ ۲؍ ٹیمیں سپر ۴؍ مرحلے میں داخل ہوں گی۔ اس مرحلے میں پہلے اور دوسرے نمبر پر آنے والی ٹیمیں ۱۷؍ ستمبر کو فائنل کھیلیں گی۔