امریکہ اور ایران کے درمیان  جنگ بندی مذاکرات تعطل کا شکار ہونے کے سبب اس پر سسپنس برقرار ہے۔ایک جانب دعویٰ کیا جارہا ہے کہ ایران کی جانب سے نئی تجاویز بھیجے جانے پر ٹرمپ ناخوش ہیں ، وہیں دوسری جانب دعویٰ کیا جارہا ہے کہ سب کچھ ٹھیک ہے اور دونوں ہی ممالک کی درپردہ گفتگو جاری ہے۔

 ٹرمپ ایران کی تجویز سے ناخوش ہیں: نیویارک ٹائمز 

امریکی اخبار نیویارک ٹائمز نے دعویٰ کیا ہے کہ امریکی صدر ڈونالڈ ٹرمپ ایران کی تجویز سے ناخوش ہیں، وہ ایران کی آبنائے ہرمز کھولنے کی پیشکش سے مطمئن نہیں۔  نیویارک ٹائمز نے لکھا کہ امریکی صدر نے اپنے مشیروں کو بتایا ایران کی پیش کش حقیقت سے انکاری ہے، جب کہ امریکی عہدے دار نے بتایا کہ صدر ٹرمپ جوہری مطالبات پر عمل کرنے کیلئے پرعزم ہیں۔ اخبار کے مطابق ایران کی تجویز میں امریکی بحری ناکہ بندی ختم کرنے کا مطالبہ شامل ہے، جب کہ جوہری پروگرام کا معاملہ ایرانی پیشکش میں شامل نہیں ہے، ایران کا یورینیم ذخیرہ حوالے کرنے اور پروگرام معطل کرنے سے انکار برقرار ہے، جب کہ ٹرمپ کا مؤقف رہا ہے کہ ایران کو جوہری ہتھیار حاصل کرنے کی اجازت نہیں دی جا سکتی۔ 

 

 

رپورٹ میں کہا گیا ہے کہ جوہری مذاکرات میں تاخیر عالمی توانائی و مالی منڈیوں کے لیے خطرہ بن سکتی ہے، جب کہ ایران کی شرط ہے کہ آبنائے ہرمز کھولنے کے بدلے جہازوں پر ٹیکس عائد کیا جائے گا۔  رپورٹ کے مطابق امریکہ روایتی طور پر عالمی آبی گزرگاہوں پر پابندیوں کی مخالفت کرتا ہے، تاہم فوجی دباؤ کے باوجود ایران کے مؤقف میں تبدیلی کے امکانات کم ہیں، کچھ حکام کے نزدیک آبنائے ہرمز کھولنے کا معاہدہ ہی بہتر راستہ ہے۔  ادھر روئٹرز نے بھی ایک امریکی عہدے دار کے حوالے سے بتایا کہ ٹرمپ تازہ تجویز سے خوش نہیں ہیں۔

 

 

سی این این نے ایک رپورٹ میں کہا ہے کہ ذرائع کا کہنا ہے کہ امریکہ اور ایران ایک دوسرے سے اتنے دور نہیں جتنے دکھائی دیتے ہیں۔  ثالثی کے عمل سے واقف ذرائع کے مطابق امریکہ اور ایران کے درمیان فاصلہ اتنا زیادہ نہیں جتنا بظاہر نظر آتا ہے، اگرچہ دونوں کے درمیان پاکستان میں مذاکرات کا دوسرا دور نہیں ہو سکا ہے۔  سی این این کے مطابق ذرائع کا کہنا ہے کہ پسِ پردہ بھرپور سفارتی کوششیں جاری ہیں اور موجودہ بات چیت ایک مرحلہ وار طریقۂ کار پر مرکوز ہے۔  اس ممکنہ معاہدے کے پہلے حصے میں جنگ سے پہلے والی صورت حال کی بحالی اور آبنائے ہرمز کو بغیر کسی پابندی یا ٹیکس کے دوبارہ کھولنے پر توجہ دی جا رہی ہے۔  ایران کے جوہری پروگرام کا معاملہ جسے امریکہ اور اسرائیل دونوں نے جنگ کی وجہ قرار دیا تھا، بعد کے مرحلے میں زیرِ بحث آئے گا۔