ایلینا سویتولینا کو ایک اور ڈبلیو ٹی اے ۱۰۰۰؍ خطاب جیتنے کے لیے طویل انتظار کرنا پڑا، لیکن سابق عالمی نمبر ۳؍ کھلاڑی نے سنیچر کوشاندار انداز میں یہ کارنامہ انجام دیا۔

ایلینا سویتولینا کو ایک اور ڈبلیو ٹی اے ۱۰۰۰؍ خطاب جیتنے کے لیے طویل انتظار کرنا پڑا، لیکن سابق عالمی نمبر ۳؍ کھلاڑی نے  سنیچر کوشاندار انداز میں یہ کارنامہ انجام دیا۔ انہوں نے تیسرے نمبر کی سیڈ کوکو گاف کو ایک اعلیٰ معیار کے فائنل میں۴۔۶، ۷۔۶، ۲۔۶؍ سے شکست دے کر اٹالین اوپن کا خطاب جیت لیا۔ یہ ۲۰۱۷ء اور۲۰۱۸ء میں مسلسل دو فتوحات کے بعد روم میں سویتولینا کا تیسرا ٹائٹل ہے۔ 
روم میں اپنا پہلا خطاب جیتنے کی کوشش کرنے والی گاف نے زبردست آغاز کیا اور دو بار بریک کر کے ۰۔۲؍ اور۲۔۴؍کی برتری حاصل کی۔ تاہم، سویتولینا نے دونوں مواقع پر واپسی کی۔ یوکرینی کھلاڑی نے اہم نویں گیم میں تین بریک پوائنٹس بچا کر ۴۔۵؍ کی برتری برقرار رکھی، پھر گاف کی سروس توڑ کر پہلا سیٹ  ۴۔۶؍سے اپنے نام کر لیا۔ 
گاف، جو اس ہفتے پہلے ہی تین سیٹوں والے کئی میچ کھیل چکی تھیں، دوسرے سیٹ میں بھی سویتولینا کے قریب رہیں۔ اگرچہ امریکی کھلاڑی نے سیٹ کے پہلے تین سروس گیمز میں ہر بار بریک پوائنٹ حاصل کیا، لیکن گیارہویں گیم تک کوئی بھی کھلاڑی بریک حاصل نہ کر سکی۔ گاف نے بریک کر کے ۵۔۶؍ کی برتری حاصل کی، لیکن سویتولینا نے فوری واپسی کرتے ہوئے بریک حاصل کیا اور مقابلہ ٹائی بریک تک پہنچا دیا۔ امریکی کھلاڑی نے ٹائی بریک ۵۔۷؍ سے جیت کر میچ برابر کر دیا۔ 

Coco Gauff at her best in the second set tiebreak 👏#IBI26 | @WTA pic.twitter.com/6NZ5KTSy4l

— Internazionali BNL d`Italia (@InteBNLdItalia) May 16, 2026

سویتولینا نے فیصلہ کن سیٹ میں جلد ہی کنٹرول حاصل کر لیا اور پانچویں اور ساتویں گیم میں بریک کر کے ۲۔۵؍کی برتری حاصل کی۔ چیمپئن شپ کے لیے سروس کرتے ہوئے یوکرینی کھلاڑی نے تین بریک پوائنٹس بچائے اور دو گھنٹے ۴۹؍ منٹ بعد اپنے تیسرے میچ پوائنٹ کو کامیابی میں بدل دیا۔ اس فتح کے بعد گاف کے خلاف ان کا ریکارڈ ۲۔۴؍ہو گیا۔ 

یہ بھی پڑھئے:خاتون کی حاضر دماغی، گھر میں گھس آئے تیندوے سے بیٹے کو بچایا

جیت کے بعد سویتولینا نے کہاکہ ’’یقیناً یہ بہت مشکل مقابلہ تھا۔ میں بہت خوش ہوں کہ میں نے اپنی گھبراہٹ کو کس طرح سنبھالا، صرف آج ہی نہیں بلکہ پورے ٹورنامنٹ کے دوران بھی۔ پچھلے دو ہفتے مشکل رہے، لیکن جس انداز سے میں کھیل رہی ہوں اور میرا جسم سخت مقابلوں میں جس طرح ردِعمل دے رہا ہے، اس سے میں بہت مطمئن ہوں۔ مجھے اپنی محنت پر فخر ہے۔‘‘

یہ بھی پڑھئے:کانز فلم فیسٹیول میں عالیہ بھٹ نے اپنے دلکش انداز میں سبھی کو متاثر کیا

سویتولینا نے اوپن ایرا میں ڈبلیو ٹی اے کلے کورٹ فائنلز میں اپنا ریکارڈ ۰۔۸؍ کر لیا اور اینا سمیشنووا کے بعد کلے کورٹ پر اپنے ابتدائی آٹھ ڈبلیو ٹی اے سطح کے فائنلز جیتنے والی صرف دوسری کھلاڑی بن گئیں۔وہ ایک ہی ٹئیروَن /ڈبلیو ٹی اے ۱۰۰۰؍ ایونٹ میں تین یا اس سے زیادہ خطابات جیتنے والی سب سے زیادہ عمر کی کھلاڑی بھی بن گئی ہیں، انہوں نے سیرینا ولیمز کو پیچھے چھوڑ دیا، جنہوں نے ۲۰۱۳ء میں میامی میں ۳۱؍ سال اور۱۷۳؍ دن کی عمر میں یہ کامیابی حاصل کی تھی۔ سویتولینا روم ٹورنامنٹ کے ایک ہی ایڈیشن میں ٹاپ فائیو کی تین فتوحات حاصل کرنے والی پہلی کھلاڑی بھی بن گئی ہیں۔  سویتولینا اب ۲۰؍ ڈبلیو ٹی اے سنگلز ٹائٹلز جیت چکی ہیں اور اوپن ایرا میں اس سنگِ میل تک پہنچنے والی پہلی یوکرینی کھلاڑی بن گئی ہیں۔