اگرچہ فیفا ورلڈ کپ ۲۰۲۶ء کا ٹائٹل اسپین نے جیتا، لیکن سب سے بڑا معاشی فاتح امریکہ رہا۔ ٹورنامنٹ کے دوران امریکی شہروں میں اسٹیڈیم کھچا کھچ بھرے رہے، ہوٹلوں، ریستورانوں، ایئرلائنز اور مقامی کاروباروں نے ریکارڈ کمائی کی، جبکہ فیفا کے لیے بھی یہ تاریخ کا سب سے زیادہ منافع بخش ورلڈ کپ ثابت ہوا۔ اندازوں کے مطابق ٹورنامنٹ سے تقریباً ۱۵؍ ارب ڈالر کی معاشی سرگرمی ہوئی، جس میں سب سے بڑا حصہ امریکہ کو ملا۔

فیفا ورلڈ کپ ۲۰۲۶ء میں اگرچہ اسپین نے ارجنٹینا کو شکست دے کر عالمی چیمپئن کا اعزاز حاصل کیا، لیکن میدان سے باہر اصل کامیابی امریکہ کے حصے میں آئی۔ امریکہ، کنیڈا اور میکسیکو کی مشترکہ میزبانی میں ہونے والے اس عالمی ایونٹ کے ۱۰۴؍ میں سے ۷۸؍ میچ امریکہ میں کھیلے گئے، جس کے نتیجے میں امریکی معیشت کو غیر معمولی فائدہ پہنچا۔ رپورٹ کے مطابق ورلڈ کپ کے دوران اسٹیڈیم تقریباً ہر میچ میں بھرے رہے، لاکھوں مقامی اور غیر ملکی شائقین نے امریکی شہروں کا رخ کیا، جس سے ہوٹلوں، ریستورانوں، بارز، ٹرانسپورٹ، خوردہ تجارت اور سیاحت سے وابستہ شعبوں میں ریکارڈ کاروبار ہوا۔ متعدد میزبان شہروں میں ہوٹلوں کی آمدنی میں نمایاں اضافہ دیکھا گیا جبکہ ریستورانوں اور تفریحی مراکز پر بھی غیر معمولی بھیڑ رہی۔ 

یہ بھی پڑھے: فیفا ۲۶ء: اسپین کی انعامی رقم ۲۰؍ کرکٹ ٹیموں سے زیادہ

مالیاتی تجزیوں کے مطابق اس ورلڈ کپ سے مجموعی طور پر تقریباً ۱۵؍ ارب ڈالر کی معاشی سرگرمی پیدا ہوئی، جس کا بڑا حصہ امریکہ کو ملا۔ اس کے علاوہ فیفا نے بھی نشریاتی حقوق، اسپانسرشپ، ٹکٹوں اور تجارتی سرگرمیوں کی بدولت اپنی تاریخ کی سب سے زیادہ آمدنی حاصل کی، جس سے ۲۰۲۶ء کا ورلڈ کپ مالی اعتبار سے اب تک کا کامیاب ترین ٹورنامنٹ بن گیا۔ امریکہ کے مختلف میزبان شہروں میں ورلڈ کپ نے صرف اسپورٹس انڈسٹری ہی نہیں بلکہ مقامی معیشت کو بھی نئی رفتار دی۔ بینکنگ اعداد و شمار کے مطابق بعض شہروں میں کریڈٹ اور ڈیبٹ کارڈ کے ذریعے خریداری میں نمایاں اضافہ ریکارڈ کیا گیا، جبکہ میچوں کے دن ہوٹلوں کی فی کمرہ آمدنی گزشتہ برس کے مقابلے میں تقریباً ۳۵؍ فیصد زیادہ رہی۔ کاروباری حلقوں کا کہنا ہے کہ کئی ریستورانوں اور کھیلوں سے متعلق مراکز نے سپر بول جیسے بڑے ایونٹس کے برابر کاروبار کیا۔ 

یہ بھی پڑھئے: میڈرڈ: اسپین کی تاریخی فتح کا جشن مگر میسی کیلئے بھی دل نرم پڑ گئے

اگرچہ طویل مدتی معاشی فوائد پر ماہرین کی رائے مختلف ہے، تاہم اس بات پر تقریباً اتفاق ہے کہ ورلڈ کپ نے امریکہ کو عالمی سطح پر کھیلوں، سیاحت اور بڑے بین الاقوامی ایونٹس کی میزبانی کے حوالے سے مزید مضبوط مقام دلایا۔ ٹرافی اسپین کے پاس گئی، مگر معاشی کامیابی، تجارتی سرگرمی اور عالمی تشہیر کے اعتبار سے امریکہ اس ورلڈ کپ کا سب سے بڑا فاتح بن کر سامنے آیا۔