فیفا ورلڈ کپ ۲۰۲۶ء نے انعامی رقم کے معاملے میں نیا ریکارڈ قائم کر دیا ہے۔ چیمپئن اسپین کو ۵؍ کروڑ ۱۰؍ لاکھ امریکی ڈالر (۵۱؍ ملین ڈالر) ملے، جو ۲۰۲۳ء کے آئی سی سی کرکٹ ورلڈ کپ میں شریک تمام ۲۰؍ ٹیموں کی مجموعی انعامی رقم سے چار گنا سے بھی زیادہ ہیں۔ فیفا نے اس بار مجموعی طور پر ۸۷۱؍ ملین ڈالر تقسیم کیے، جو عالمی کھیلوں کی تاریخ کے سب سے بڑے انعامی فنڈز میں شمار ہوتا ہے۔

فیفا ورلڈ کپ ۲۰۲۶ء نے نہ صرف میدان میں بلکہ مالی لحاظ سے بھی نئی تاریخ رقم کر دی ہے۔ اسپین نے ارجنٹائنا کو فائنل میں ۱۔صفر سے شکست دے کر دوسری مرتبہ عالمی چیمپئن بننے کے ساتھ ۵؍ کروڑ ۱۰؍ لاکھ امریکی ڈالر کی ریکارڈ انعامی رقم بھی اپنے نام کر لی۔ یہ رقم اتنی زیادہ ہے کہ صرف اسپین کو ملنے والا انعام ۲۰۲۳ء کے آئی سی سی کرکٹ ورلڈ کپ میں شریک تمام ۲۰؍  ٹیموں میں تقسیم ہونے والی مجموعی انعامی رقم سے چار گنا سے بھی زیادہ ہے۔ فیفا نے ۴۸؍ ٹیموں پر مشتمل اس توسیع شدہ ورلڈ کپ کے لیے مجموعی طور پر ۸۷۱؍ ملین ڈالر مختص کیے، جن میں ۶۵۵؍  ملین ڈالر کارکردگی کی بنیاد پر انعامی رقم، جبکہ باقی رقم تیاری، سفری اخراجات اور دیگر معاونت کے لیے رکھی گئی۔ عالمی چیمپئن اسپین کو ۵۱؍ ملین ڈالر، رنر اپ ارجنٹائنا کو ۳۴؍ ملین ڈالر، تیسری پوزیشن حاصل کرنے والے انگلینڈ کو ۳۰؍ ملین ڈالر اور چوتھے نمبر پر رہنے والے فرانس کو ۲۸؍ ملین ڈالر ملے۔ 

یہ بھی پڑھئے: فیفا ۲۶ء: فائنل کے بعد ارجنٹائنا کے ۲؍ کھلاڑیوں نے ٹرمپ سے مصافحہ نہیں کیا

فیفا کی نئی مالی پالیسی کے تحت ہر شریک ٹیم کو گروپ مرحلے تک پہنچنے پر بھی خطیر رقم دی گئی۔ ہر ٹیم کو ۱۰؍ ملین ڈالر کی شرکت فیس اور ۵ء۲؍ ملین ڈالر کی تیاری گرانٹ فراہم کی گئی، جس کے باعث ٹورنامنٹ سے ابتدائی مرحلے میں باہر ہونے والی ٹیمیں بھی خاطر خواہ مالی فائدہ حاصل کرنے میں کامیاب رہیں۔ اس کے مقابلے میں آئی سی سی کے حالیہ عالمی ٹورنامنٹس کی انعامی رقم نمایاں طور پر کم رہی ہے۔ کرکٹ میں عالمی سطح پر انعامی فنڈ اگرچہ گزشتہ برسوں میں بڑھا ہے، لیکن مجموعی مالی تقسیم اب بھی فیفا ورلڈ کپ کے مقابلے میں بہت پیچھے ہے۔ اسی فرق کی وجہ سے فٹ بال کا عالمی کپ نہ صرف ناظرین بلکہ مالی اعتبار سے بھی دنیا کا سب سے بڑا کھیلوں کا ایونٹ تصور کیا جاتا ہے۔ 

رپورٹس کے مطابق فیفا نے اس مرتبہ انعامی رقم میں نمایاں اضافہ یورپی فٹ بال تنظیموں کے مطالبات اور امریکہ، کنیڈا اور میکسیکو میں منعقدہ طویل فاصلے کے سفر اور انتظامی اخراجات کو مدنظر رکھتے ہوئے کیا۔ تنظیم نے ٹیموں کے لیے کاروباری درجے کی فضائی سفر، ہوٹل، مقامی نقل و حمل اور دیگر سہولتوں کا بھی بندوبست کیا، جبکہ انعامی رقم متعلقہ قومی فٹ بال فیڈریشنز کو ادا کی جائے گی، جسے بعد میں ہر ملک اپنی پالیسی کے مطابق کھلاڑیوں اور عملے میں تقسیم کرے گا۔ 

یہ بھی پڑھئے: میڈرڈ: اسپین کی تاریخی فتح کا جشن مگر میسی کیلئے بھی دل نرم پڑ گئے

کھیلوں کے مالی ماہرین کے مطابق ۲۰۲۶ء کے فیفا ورلڈ کپ نے ایک بار پھر ثابت کر دیا ہے کہ عالمی فٹ بال کی تجارتی طاقت دیگر کھیلوں سے کہیں زیادہ ہے۔ اسپین کی تاریخی فتح کے ساتھ ملنے والی ریکارڈ انعامی رقم نے نہ صرف اس ٹورنامنٹ کی بڑھتی ہوئی معاشی اہمیت کو اجاگر کیا بلکہ مستقبل میں عالمی کھیلوں کے مالی ڈھانچے پر بھی نئے سوالات کھڑے کر دیے ہیں۔