کپتان پربھ سمرن سنگھ کی شاندار ۸۸؍رنوں کی اننگز اور بولرز کی بہترین کارکردگی کی بدولت پنجاب نے منگل کو مدھیہ پردیش کو  ۱۸۳؍رنز کے بڑے فرق سے شکست دے کر وِجئے ہزارے ٹرافی کے سیمی فائنل میں جگہ بنالی۔ پنجاب نے مقررہ ۵۰؍ اوورز میں ۶؍ وکٹ پر ۳۴۵؍رنز بنائے اور مدھیہ پردیش کو صرف ۳۱؍ اوورز میں ۱۶۲؍ رنز پر آؤٹ کر دیا۔ پربھ سمرن کو ان کی اننگز کے لیے پلیئر آف دی میچ کا ایوارڈ ملا۔

پربھ سِمرن نے ۸۶؍ گیندوں کی اپنی اننگز میں ۱۰؍چوکے اور ۲؍چھکے لگا کر۸۸؍رنز بنائے۔ اس کے علاوہ  ہرنور سنگھ نے ۵۱؍ اور انمول پریت سنگھ نے ۷۰؍ رنز بنائے۔ نہال وڈیرہ نے ۳۸؍ گیندوں میں ۸؍چوکے اور ایک چھکا لگاتے ہوئے تیز رفتار ۵۶؍ رنز بنائے۔مدھیہ پردیش کی طرف سے رجت پاٹیدار نے سب سے زیادہ ۳۸؍ اور تریبُرش سنگھ نے ۳۱؍ رنز بنائے۔ پنجاب کی طرف سے سنویر سنگھ نے ۳؍اور گُرنُور برار، کرِش بھگت اور رمن دیپ سنگھ نے ۲۔۲؍وکٹیں حاصل کیں۔