لا لیگا کے ایک سنسنی خیز مقابلے میں ولارریئل نے کھیل کے آخری لمحات میں گول کر کے نا صرف میچ ایک ایک سے برابر کر دیا بلکہ ریلیگیشن کے خطرے سے دوچار الاویس کے مداحوں کے دل بھی توڑ دئیے۔

لا لیگا کے ایک سنسنی خیز مقابلے میں ولارریئل نے کھیل کے آخری لمحات میں گول کر کے نا صرف میچ ایک ایک سے برابر کر دیا بلکہ ریلیگیشن کے خطرے سے دوچار الاویس کے مداحوں کے دل بھی توڑ دئیے۔ الاویس کی ٹیم ۶؍ میچوں کے بعد اپنی پہلی جیت اور نئے کوچ کوئیک سانچیز فلورس کی قیادت میں پہلے ۳؍ پوائنٹس حاصل کرنے کے بالکل قریب تھی، لیکن قسمت کو کچھ اور ہی منظور تھا۔ 
میچ کے ۴۰؍ویں منٹ میں الاویس کو اس وقت برتری ملی جب ولارریئل کے سینٹر بیک رافا مارین نے نادانستہ طور پر اپنی ہی ٹیم کے خلاف ’اون گول‘ کر دیا۔ ٹونی مارٹنیز کے ایک بہترین بیک ہیل شاٹ سے گیند رافا مارین کے سر سے ٹکرائی اور سیدھی ان کے اپنے ہی گول کیپر کو چکمہ دیتے ہوئے جال میں جا گری۔ 

یہ بھی پڑھئے: نیوزی لینڈ کرکٹ ٹیم کے کوچز کو پی ایس ایل ۱۱؍ کے لیے این او سی جاری

جب ایسا لگ رہا تھا کہ الاویس یہ میچ جیت جائے گا تو ۷؍ منٹ کے اضافی وقت کے آخری لمحات میں نکولس پیپے نے ایک شاندار جوابی حملے کو گول میں بدل کر میچ برابر کر دیا۔ اس ڈرا کے نتیجے میں ولارریئل نے ایٹلیٹیکو میڈرڈ کو پیچھے چھوڑتے ہوئے ٹیبل پر تیسری پوزیشن حاصل کر لی ہے۔ دوسری جانب الاویس ۱۶؍ ویں نمبر پر برقرار ہے اور ریلیگیشن زون سے محض ۳؍پوائنٹس کی دوری پر ہے جس کی وجہ سے ان کے لئے آنے والے میچز مزید مشکل ہو گئے ہیں۔