جنوبی افریقہ کے کپتان ایڈن مارکرم نے کہا ہے کہ ان کی ٹیم پاکستان کے خلاف دوسرے ٹیسٹ میچ میں واپسی کے لیے پرعزم ہے، پروٹیز اسکواڈ سیریز برابر کرنے کے عزم کے ساتھ پیر کو راولپنڈی کرکٹ اسٹیڈیم میں میدان پر اترے گا۔

 جنوبی افریقہ کے کپتان ایڈن مارکرم نے کہا ہے کہ ان کی ٹیم پاکستان کے خلاف دوسرے ٹیسٹ میچ میں واپسی  کے لیے پرعزم ہے، پروٹیز اسکواڈ سیریز برابر کرنے کے عزم کے ساتھ پیر کو راولپنڈی کرکٹ اسٹیڈیم میں میدان پر اترے گا۔ اتوار کو راولپنڈی کرکٹ اسٹیڈیم میں پریس کانفرنس کرتے ہوئے ایڈن مارکرم نے کہا کہ ٹیم کا حوصلہ بلند ہے اور تمام کھلاڑی جیت کی راہ پر لوٹنے  کے لیے پرجوش ہیں۔ 
انہوں نے کہا کہ لاہور میں پہلا ٹیسٹ ہارنے کے باوجود ٹیم نے اپنی غلطیوں کا جائزہ لیا ہے اور دوسرے میچ کے لیے بہتر حکمت عملی تیار کر لی گئی ہے۔ ایڈن مارکرم نے بتایا کہ تجربہ کار اسپنر کیشو مہاراج کی ٹیم میں واپسی سے اسکواڈ کو زبردست تقویت ملی ہے۔ 
انہیں دوبارہ ٹیم کا حصہ بنانا ہمارے لیے خوش آئند ہے۔ جنوبی افریقی کپتان نے کہا کہ راولپنڈی کی پچ اچھی دکھائی دے رہی ہے تاہم امکان ہے کہ اسپنرس ایک بار پھر اہم کردار ادا کریں گے۔  انہوں نے کہا کہ ہم نے پہلے میچ کے بعد اپنی حکمت عملی میں تبدیلیاں کی ہیں اور امید ہے کہ اس بار نتائج بہتر رہیں گے۔ انہوں نے کہا کہ راولپنڈی کی حالات لاہور سے کچھ مختلف ضرور ہوں گے مگر چیلنج تقریباً ویسا ہی رہے گا۔ ہم دیکھیں گے کہ پچ کتنی جلدی اسپن ہونا شروع کرتی ہے، تاہم ہماری تیاری ہر ممکن صورتحال کے لیے مکمل ہے۔ ایڈن مارکرم نے بتایا کہ انہوں نے ذاتی طور پر نیٹس میں زیادہ وقت گزارا ہے تاکہ برصغیر کی کنڈیشنز میں اپنی بیٹنگ کو مزید بہتر بنا سکیں۔ 
انہوں نے کہا کہ وہ ذہنی طور پر مطمئن ہیں اور بطور کپتان ٹیم کے لیے بہترین کارکردگی پیش کرنے کے لیے پرعزم ہیں۔ ہم دل و جان سے کھیلیں گے اور میچ جیتنے کی سرتوڑ کوشش کریں گے۔ واضح رہے کہ پاکستان کو دو ٹیسٹ میچوں کی سیریز میں۰۔۱؍ کی برتری حاصل ہے ، پاکستان نے پہلے ٹیسٹ میچ میں جنوبی افریقہ کو۹۳؍ رن سے شکست دی تھی۔ دونوں ٹیموں کے درمیان دوسرا اور آخری ٹیسٹ میچ   پیر  سے راولپنڈی کرکٹ اسٹیڈیم میں شروع ہو گا۔

یہ بھی پڑھئے:روہت اور وراٹ جلد آؤٹ ہوئے، ہندوستان کو پہلے ون ڈے میں شکست

آئی سی سی ورلڈ ٹیسٹ چمپئن شپ کے سلسلے میں پاکستان اور جنوبی افریقہ کی کرکٹ ٹیموں کے درمیان دو ٹیسٹ میچوں پر مشتمل سیریز کا دوسرا اور آخری ٹیسٹ میچ  پیر سے راولپنڈی کرکٹ اسٹیڈیم میں شروع ہو گا۔ پاکستان کو سیریز میں۰۔۱؍ کی برتری حاصل ہے۔ قذافی اسٹیڈیم لاہور میں کھیلے جانے والے  پہلے ٹیسٹ میچ میں پاکستان نے جنوبی افریقہ کو ۹۳؍ رن سے شکست دی تھی۔ پاکستانی ٹیم شان مسعود کی قیادت میں میدان میں اترے گی اور کھلاڑی سیریز میں کلین سویپ کے عزم کے ساتھ پرجوش نظر آرہے ہیں۔ پہلے ٹیسٹ میں شاندار کارکردگی کی بدولت پاکستان ٹیم کا حوصلہ  بلند ہے۔  دوسری جانب جنوبی افریقہ کے کپتان ایڈن مارکرم راولپنڈی ٹیسٹ جیت کر سیریز برابر کرنے کے لیے پرعزم ہیں۔