اسپین نے سوئزر لینڈ کو ۱۔۵؍ گول سے روند کر راؤنڈ ۸؍ میں جگہ بنائی۔ اسپینی بون متی نے ۲؍گول کئے۔ ہسپانوی ٹیم نے ایک اون گول کیا

 ایتانا بونمتی کے ۲؍ گول کی بدولت اسپین نے سنیچر کو۲۰۲۳ء فیفا خواتین ورلڈ کپ کے سپر۱۶؍ مرحلے میں  سوئزر لینڈ کو۱۔۵؍ سے شکست دے کر پہلی بار ٹورنامنٹ کے کوارٹر فائنل میں داخلہ حاصل کیا۔
 ایڈن پارک آؤٹر اوول میں مڈفیلڈر بون متی (۵؍ ویں، ۳۶؍ویں منٹ) نے ۲؍ گول کئے، جبکہ البا ریڈونڈو (۱۷؍ویں)، لایا کوڈینا (۴۵؍ویں) اور جینیفر ہرموسو (۷۰؍ویں) نے ایک ایک گول کیا۔ لایا کوڈینا (۱۱؍ویں منٹ) نے بھی اون گول کر کے  سوئزر لینڈ کا کھاتہ کھول دیا۔
 اس یکطرفہ مقابلے میں بون متی نے ۵؍ویں منٹ میں ہی گول کر کے اسپین کا کھاتہ کھول دیا۔ سوئس ٹیم کا کوئی کھلاڑی گیند کو جال میں نہ پہنچا سکا، تاہم ۱۱؍ویں منٹ میں اسپین کے دفاعی کھلاڑی کوڈینا کا پاس گول کیپر کیٹ کول کو کراس کرنے کی وجہ سے  سوئزر لینڈ کا کھاتہ کھلا۔ اس کے بعد اسپین نے دفاع میں کوئی غلطی نہیں کی۔ ریڈونڈو نے ۱۷؍ویں منٹ میں اسپین کو برتری دلائی جبکہ کوڈینا نے ہاف ٹائم سے قبل اپنی غلطی ٹھیک کرتے ہوئے اسپین کی سبقت ۱۔۴؍ کردی۔ اس سے قبل۳۶؍ویں منٹ میں بون متی نے سوئس ڈیفنڈرس اور گول کیپر کو چکمہ دے  کر اپنا دوسرا گول پنالٹی باکس میں کیا۔
 سوئزرلینڈ نے دوسرے ہاف میں زیادہ مسابقتی رویہ کا مظاہرہ کیا، حالانکہ وہ اسکور کو تبدیل کرنے میں ناکام رہے۔ سوئزر لینڈ  کی متبادل میریم ٹارکون بھی گول کرنے کے قریب پہنچیں لیکن ہسپانوی گول کیپر کول کو شکست نہ دے سکیں۔ بالآخر، ہرموسو نے۷۰؍ویں منٹ میں گول کرکے اسپین کو ۱۔۵؍گول  سے فتح دلادی۔ کوارٹر فائنل میں اسپین کا مقابلہ اب جنوبی افریقہ یا ہالینڈ سے ہوگا۔ یہ دونوں ہی ٹیمیں ٹورنامنٹ میں اچھا کھیل رہی ہیں۔